АҚШ Суриядаги 7 та ҳарбий базасини ёпади

Сўнгги ҳафтада Қўшма Штатлар Суриядан 500 га яқин аскарини олиб чиқди. Шунингдек, мамлакатдаги 8 та ҳарбий базасидан фақат биттасини сақлаб қолиш ниятида.

Фото: AP

Вашингтоннинг Анқарадаги элчиси ва Сурия бўйича махсус вакили Томас Баррак АҚШ Суриядаги ҳарбий иштирокини қисқартираётганини тасдиқлади. Америка ҳукумати мамлакатдаги саккизта ҳарбий базадан фақат биттасини сақлаб қолишни режалаштирмоқда.

«Саккизта базадан бештага ўтдик, кейин эса учтага. Охир-оқибат биттага ўтамиз», — дейди Баррак.

Сўнгги ҳафтада АҚШнинг 500 нафарга яқин аскари Суриядан олиб чиқилган. Fox News журналисти Женнифер Гриффиннинг америкалик амалдорларга таяниб ёзишича, базаларнинг учтаси «Сурия демократик кучлари»га берилган ёки ёпилган.

Сурияда режим алмашгач ва Аҳмад аш-Шаръа ҳокимият тепасига келгач, АҚШ президент Доналд Трамп Вашингтон Дамашқ билан муносабатларни яхшилаш ниятида эканини маълум қилди. У Сурияга «буюклик учун имконият» бериш мақсадида мамлакатга қарши санкцияларни бекор қилишни буюрди. 29 май куни Дамашқда 13 йиллик танаффусдан кейин АҚШ элчисининг қароргоҳи яна иш бошлади.

Аввалроқ АҚШ Суриядаги хорижлик жангариларни армия таркибига киритиш режасини маъқуллаган эди.