Қозоғистонда электр таъминоти узилгани Ўзбекистонга ҳам таъсир қилди

19 июн куни Қозоғистондаги «Экибастуз» энергетика узелида ноқулай об-ҳаво шароити туфайли 500 kV электр узатиш тармоғи фавқулодда ўчди. Бу Ўзбекистонга ҳам таъсир қилди, деб хабар берди Энергетика вазирлиги.

Қайд қилинишича, фавқулодда ўчиш оқибатида Марказий Осиё ягона энергетика тизимида, шу жумладан, Ўзбекистонда ҳам частота тушишлари кузатилган.

«Авариявий ҳолатни бартараф этиш мақсадида айрим ҳудудларда қисқа муддатли мажбурий чекловлар киритилди. Соат 19:30 да 500 kV электр узатиш линиясидаги носозлик бартараф этилди ва таъминот тикланди», дейилади хабарда.