Зеленский Москва ва Боку ўртасидаги зиддият фонида Алиевни қўллаб-қувватлади

1 июл, сешанба куни Украина ва Озарбойжон президентлари Володимир Зеленский ва Илҳом Алиев телефон орқали мулоқотда Москва ва Боку муносабатларининг кескинлашувини муҳокама қилди. «Россия Озарбойжон фуқароларини тахқирлаётган ва Озарбойжон Республикасига таҳдид солаётган вазиятда мен Украинадан аниқ қўллаб-қувватлашимни билдирдим», — деб ёзди Зеленский ўзининг Telegram-каналида.

Украина президенти ака-ука Гусейн ва Зияддин Сафаровнинг Екатеринбургда қўлга олинганидан кейин вафот этганини «қотиллик» деб атади ва Озарбойжон президентига Украина жамоатчилиги номидан ҳамдардлик билдирди. «Ишончим комилки, барча фактларга ойдинлик киритилади. Адолат керак», — деди сиёсатчи. Алиев Зеленскийга ҳамдардлик сўзлари учун миннатдорчилик билдирди, деб хабар қилди Озарбойжон президенти матбуот хизмати.

Бундан ташқари, Володимир Зеленский Илҳом Алиевга Украина, унинг ҳудудий яхлитлиги ва халқини қўллаб-қувватлагани, жумладан Озарбойжоннинг Украина фуқароларини Эрондан эвакуация қилишда кўрсатган ёрдами учун миннатдорчилик билдирди. Президентлар, шунингдек, икки томонлама муносабатлар, энергетика, мамлакатлар ўртасидаги гуманитар соҳадаги ҳамкорликни муҳокама қилди ва Бокуда Иқтисодий ҳамкорлик бўйича ҳукуматлараро қўшма комиссия йиғилишини ўтказишга келишиб олди.

Россия ва Озарбойжон ўртасидаги муносабатларда таранглик 27 июн куни Екатеринбургда озарбойжон диаспораси вакилларининг оммавий қўлга олинганидан сўнг кескинлашди. Россия расмийларига кўра, қўлга олишлар 2000-йиллар бошида содир этилган қотилликлар юзасидан амалга оширилган. Рейд ортидан Озарбойжон Ташқи ишлар вазирлиги қўлга олинганлар орасида ҳалок бўлганлар ва ярадорлар борлигини маълум қилиб, «бу қабул қилиб бўлмайдиган зўравонлик учун жавобгарлар»нинг жавобгарликка тортилишини талаб қилди.