Бухорода Марказий Осиё ва Озарбойжон етакчи аёллари мулоқоти бўлиб ўтди

Маълум қилинишича, мазкур платформа 2020 йилда Ўзбекистон ташаббуси билан минтақа хотин-қизларини қўллаб-қувватлаш, уларнинг сиёсий, иқтисодий ва ижтимоий ролини ошириш мақсадида ташкил этилган. Қисқа вақт ичида у гендер тенглик ва барқарор ривожланишни илгари суришга қаратилган муҳим норасмий минтақавий коалицияга айланган.

Мажлисни Олий Мажлис Сенати раиси Танзила Норбоева очиб берди. У ўз нутқида хотин-қизларнинг ижтимоий-сиёсий фаоллигини ошириш, уларнинг давлат бошқарувидаги иштирокини кенгайтириш ва салоҳиятини қўллаб-қувватлаш минтақа тараққиёти учун муҳим аҳамият касб этишини таъкидлади.

Тадбир доирасида аёлларнинг илм-фан ва инновациялар соҳасидаги роли, замонавий таҳдидлар, сунъий интеллект, экология, барқарор ривожланиш ва илмий ҳамкорлик масалалари муҳокама қилинди. Иштирокчилар глобал иқлим ўзгариши, сув танқислиги ва рақамли трансформация шароитида илмий тадқиқотлар ҳамда инновацион ечимлар аҳамияти ортиб бораётганини қайд этди.

Шунингдек, “Илм-фанда аёллар етакчилиги: ҳозирги замон таҳдидлари, инновацион ечимлар ва илмий ҳамкорлик” мавзусида олима аёллар форуми ҳам бўлиб ўтди. Форумда Марказий Осиё ва Озарбойжон олима аёллари ўртасида барқарор илмий ҳамкорлик платформасини яратиш, тажриба алмашиш ва қўшма тадқиқотларни ривожлантириш масалалари кўриб чиқилди.

Муҳокамалар давомида илм-фанни молиялаштириш, инновацион инфратузилмани ривожлантириш, ёш тадқиқотчиларни қўллаб-қувватлаш ва аёллар учун илмий соҳадаги институционал тўсиқларни бартараф этиш бўйича таклифлар билдирилди.

Форум якунида минтақада илмий ҳамкорликни кучайтириш ва қўшма тадқиқотларни ривожлантиришга қаратилган SheScience Central Asia олима аёлларнинг минтақавий тармоғини яратишни назарда тутувчи Қўшма коммюнике қабул қилинди.