Володимир Зеленский Россияга қарши махсус санкциялар киритди

Украина президенти Володимир Зеленский 6 июл, якшанба куни Россияга қарши махсус санкциялар жорий этганини маълум қилди. Бу ҳақда Президент офиси сайтида эълон қилинган фармонда айтилган. Президент ўзининг Telegram-каналида санкциялар молиявий ва криптовалюта схемаларига таъсир қилишини ёзди. Чекловларга дучор бўлган юридик шахслар орасида тоғ-кон ва инвестициялар билан боғлиқ компаниялар бор.

«Умуман олганда, бугунги кунда пакет 60 та юридик шахсга нисбатан санкцияларни ўз ичига олади ва биз ҳар бири бўйича ҳамкорларимиз билан ишлаймиз — ўзимизники ва Европаники, бизники ва дунёнинг бошқа муҳим юрисдикциялари билан. Тўплам шунингдек, 73 нафар шахсни ҳам ўз ичига олади, уларнинг барчаси Россия фуқаролари. Биз уларга нисбатан санкцияларни ҳам синхронлаштирамиз», — деди Зеленский.

Санкцияларга дучор бўлган ташкилотлар орасида Россия саноат майнинги ассоциацияси, "Кузбасс Майнинг" МЧЖ, "ВТБ Капитал Трейдинг" МЧЖ, "Т-Проекты" МЧЖ, "ПСБ Инновации и инвестиции" МЧЖ, шунингдек, хорижий компаниялар ҳам бор (масалан, Кипр ва БААда рўйхатдан ўтган).

21 июн куни Украина президенти Россияга босимни кучайтиришга қаратилган «махсус чора-тадбирлар ойлиги»ни эълон қилди. Киев ва унинг ҳамкорлари томонидан чекловларни кучайтиришдан ташқари, давлат раҳбари турли учувчисиз учоқларга кўпроқ ресурслар ажратилиши ҳамда мамлакат бошқарув жамоаси ва дипломатик корпус таркибидаги ўзгаришларни эълон қилди.