WSJ Трампнинг пресс-пулидан чиқариб ташланади

The Wall Street Journal газетаси АҚШ президенти Доналд Трампга Шотландияга сафари чоғида ҳамроҳлик қиладиган пресс-пулдан чиқариб ташланади, дея маълум қилди Оқ уй. Қарор Трампнинг Эпштейнга мактуби эълон қилиниши билан боғлиқ.

Кэролайн Ливитт Фото: Hu Yousong/Xinhua/IMAGO

Оқ уй The Wall Street Journal газетасини АҚШ президенти Доналд Трампга Шотландияга сафари чоғида ҳамроҳлик қиладиган пресс-пулдан чиқариб ташлашини маълум қилди. Бу ҳақда Оқ уй матбуот котиби Кэролайн Ливитт маълумот берди.

«The Wall Street Journal'нинг ёлғон ва туҳматли хатти-ҳаракатлари туфайли улар бортдаги 13 та нашр орасида бўлмайди», деди Ливитт.

Сафар 25-29 июл кунларига белгиланган. Трамп ёзги таътилни Шотландияда ўтказиши кутилмоқда.

АҚШ президенти аввалроқ The Wall Street Journal ва унинг эгаси, медиамагнат Руперт Мердок устидан судга мурожаат қилган эди. Бунга республикачи президент томонидан болаларга зўравонлик қилишда гумонланаётган миллиардер Жеффри Эпштейнга ёзган хати ҳақида хабар берилган мақола сабаб бўлганди.