"Марказий Осиё – Марказий Америка" экспертлар платформаси яратилади

Мулоқот чоғида Ўзбекистон билан Марказий Америка давлатлари ўртасидаги парламентлараро ҳамкорликни кенгайтириш масалалари муҳокама қилинди.

Томонлар икки ҳудуднинг қонун чиқарувчи органлари ўртасида ўзаро англашув ва ишончни мустаҳкамлашга хизмат қилувчи барқарор ва тизимли алоқаларни йўлга қўйиш муҳимлигини таъкидлади.

Суҳбат чоғида "Марказий Осиё – Марказий Америка" форматида эксперт платформасини яратиш имкониятлари хусусида фикр алмашилди. Ушбу формат ўзаро ҳамкорликнинг амалий механизмларини ишлаб чиқиш, томонларни қизиқтирган соҳаларни аниқлаш ва институционал мулоқот учун мустаҳкам пойдевор яратиш имконини бериши таъкидланди.

Мазкур ташаббуснинг давоми сифатида Марказий Америка-Марказий Осиё мамлакатлари ижро ҳокимияти ва қонун чиқарувчи органлари вакиллари иштирокида ҳудудлараро форум ўтказиш механизмини ишга тушириш таклиф этилди.

Бундай мулоқотнинг йўлга қўйилиши кенг доирадаги долзарб мавзуларни, жумладан иқтисодий ҳамкорлик ва сармоявий шерикликдан тортиб, атроф-муҳит муаммолари, барқарор ривожланиш ва гуманитар алмашинувларгача қамраб олиши мумкин.

Ўзбекистон ва Марказий Америка мамлакатлари ўртасида мунтазам алоқаларни ривожлантириш, тажриба алмашиш ва турли соҳаларда қўшма лойиҳаларни амалга оширишга қаратилган кўп томонлама платформа – "хаб-кўприк"ни яратиш масалалари муҳокамаси музокараларнинг муҳим йўналиши бўлди.

Қайта тикланадиган энергия манбалари соҳасидаги ҳамкорлик масалаларига ҳам эътибор қаратилди. Марказий Америка томони "яшил" энергия соҳасида, хусусан, гидро, қуёш ва геотермал энергиядан фойдаланишда тўпланган тажрибаси билан ўртоқлашди. Ушбу стратегик муҳим соҳада технологиялар алмашинуви ва қўшма ташаббусларни амалга оширишга юқори қизиқиш билдирилди.

Учрашув якунда шерикликнинг истиқболли йўналишларини белгилаган ҳолда, минтақалараро ҳамкорлик механизмини ишга туширишга келишиб олинди.