Франция ва Британия ортидан Малта ҳам Фаластинни тан олади

Ўрта Ер денгизидаги орол давлат – Малта тарихан фаластинликларни қўллаб келган ва икки давлатли ечим тарафдори бўлган.

Фото: Reuters

Малта сентябр ойида БМТ Бош ассамблеяси доирасида Фаластин давлатини тан олади. Бу ҳақда мамлакат бош вазири Роберт Абела 29 июл куни маълум қилди.

Абела бу қарорни Буюк Британия бош вазири Кейр Стармернинг шунга ўхшаш баёнотидан бир неча соатдан сўнг, Франция тан олиш режасини эълон қилганидан эса бир неча кун ўтиб билдирди.

«Бизнинг позициямиз Яқин Шарқда барқарор тинчлик учун саъй-ҳаракатларга содиқлигимизни акс эттиради» деди Абела Facebookʼдаги постида.

Reuters нашрининг ёзишича, Малта ҳукумати шу вақтга қадар ички босим остида Фаластинни тан олишга чақирилиб келаётган эди. Июл ўрталарида марказ-ўнг мухолифат ҳам Фаластинни дарҳол тан олишга чақирган эди.

Ўрта Ер денгизи орол давлати бўлган Малта тарихан фаластинликлар масаласини қўллаб келган ва икки давлатли ечим тарафдори.

Абела илк бор Фаластинни тан олиш режасини май ойида эълон қилган, бу сентябр ойида БМТ конференцияси доирасида амалга оширилиши режалаштирилган эди. Аммо конференция кейинроққа қолдирилган.

Эслатиб ўтамиз, 2024 йил май ойида Ирландия, Норвегия ва Испания Фаластинни мустақил давлат сифатида тан олган эди.