Tashkent City Mall'да JW Marriott меҳмонхонаси очилади

Marriott International меҳмонхоналар тармоғи Ўзбекистонда JW Marriott бренди остида отел очади. Компания 28 июл куни маҳаллий Alliance Holding билан бу ҳақда шартнома имзолаганини эълон қилди.

Фото: Marriott International

Премиум тоифадаги меҳмонхона Tashkent City Mall'да жойлашади ва 2025 йил охиригача фаолият бошлайди. Бу ҳақда Kun.uz'га тақдим этилган пресс-релизда сўз боради.

Қайд этилишича, отел мижозларга 287 та ҳашаматли хона, турли-туман ресторанлар, велнес-марказ, Spa, бизнес-лаунж зона ва замонавий конференц-зал хизматларини таклиф этади.

Marriott International'нинг Ўзбекистондаги лойиҳалари портфелида бунгача Courtyard by Marriott Tashkent меҳмонхонаси бор эди.

“JW Marriott Hotel Tashkent'нинг очилиши – Марказий Осиё меҳмонхона бозорининг люкс сегментида жиддий ўсиш потенциали борлигидан далолат беради. Тошкент туристлар ва бизнес-сайёҳлар орасида анча оммалашиб боряпти. Биз JW Marriott брендининг мукаммал сервиси, эстетикаси ва уйғунлашган ҳордиқ концепцияси билан Ўзбекистонга кириб келиш орқали бу тенденцияни қўллаб-қувватлаётганимиздан фахрланамиз”, – деди Marriott International'нинг Марказий ва Шарқий Осиё бўйича катта вице-президенти Ивица Чачич.

Marriott International – АҚШнинг Мэриленд штатидаги Бетесда шаҳрида асосланган йирик ҳолдинг. Унинг портфели – 144 та мамлакат ва ҳудудда жойлашган 30 дан ортиқ брендларга мансуб 9500 дан зиёд кўчмас мулклардан иборат.

“Alliance Holding” МЧЖ – 2018 йил 5 март куни Тошкент шаҳрида рўйхатга олинган. Давлат реестрида кўрсатилган фаолият тури – “бошқа маиший товарлар улгуржи савдоси”. Устав фонди – 30 млн сўм. Ягона таъсисчиси ва раҳбари сифатида Шукуров Алишев Абдувоҳидович қайд этилган.