Кремл: Путин ва Трамп «яқин кунларда» учрашади

Россия ва АҚШ президентлари келаси ҳафта учрашиши мумкин, деди Путиннинг ёрдамчиси Юрий Ушаков. Ўтказиш жойи келишиб олинган, аммо кейинроқ эълон қилинади, дея қўшимча қилди у.

Фото: Evan Vucci/AP/dpa/picture alliance

Россия ва АҚШ яқин кунларда икки давлат президентлари Владимир Путин ва Доналд Трамп ўртасида учрашув ўтказишга келишиб олди. Бу ҳақда 7 август, пайшанба куни Россия президенти ёрдамчиси Юрий Ушаков маълум қилди.

«Америка томонининг таклифига кўра, яқин кунларда икки томонлама саммит, яъни президент Владимир Путин ва Доналд Трамп ўртасида учрашув ўтказиш тўғрисида принципиал келишувга эришилди», — дея Ушаков сўзларидан иқтибос келтирмоқда ТАСС давлат ахборот агентлиги.

Россия президенти ёрдамчисининг сўзларига кўра, учрашув келаси ҳафта бўлиб ўтиши кутилмоқда, Москва ва Вашингтон унга тайёргарлик кўришни бошлади. Ушаковнинг қўшимча қилишича, ўтказиш жойи келишилган, аммо кейинроқ маълум қилинади.

Россия Федерацияси ва АҚШ раҳбарларининг юзма-юз музокараларига тайёргарлик Трамп томонидан Украинада ўт очишни тўхтатиш келишувига эришиш учун белгиланган муддат тугашидан бир кун олдин олиб борилди. Агар Москва тинч йўл билан келишувдан бош тортса, Трамп Россия энергетика ресурсларининг энг йирик харидорларига қарши иккиламчи санкциялар қўллаш билан таҳдид қилган.