Алиев AZAL самолёти қасддан уриб туширилган деб ҳисобламайди

Озарбойжон раҳбари самолёт Россия томонидан қасддан уриб туширилган деб ҳисобламаслигини, аммо Россия айбни расман тан олиши кераклигини айтди.

Фото: AP

Озарбойжон 2024 йил декабрь ойида Қозоғистонда Azerbaijan Airlines (AZAL) самолётининг қулашини қасддан қилинган ҳужум деб ҳисобламайди, деди президент Илҳом Алиев Fox News телеканалига берган интервьюсида. Унинг қўшимча қилишича, Боку Россиядан айбни расман тан олиш, айбдорларни жазолаш ва тўлиқ товон тўлашни талаб қилмоқда.

2024 йил 25 декабрь куни Қозоғистоннинг Оқтов шаҳри яқинида Бокудан Грознийга учаётган AZAL самолёти ҳалокатга учради. Ҳалокат оқибатида самолёт бортида бўлган 67 кишидан 38 нафари ҳалок бўлди.

Алиевнинг айтишича, самолёт Грозний шаҳри ҳудудида ташқи таъсир туфайли шикастланган ва бу бошқарувни йўқотишга олиб келган. Июль ойида у Озарбойжон ҳалокат муносабати билан Россияга қарши халқаро судларга мурожаат қилиш учун ҳужжатларни тайёрлаётганини айтганди. Алиев Боку мунтазам равишда Россия Тергов қўмитасига сўров юбораётганини, бироқ унга фақат «тергов давом этмоқда» деган жавоб келаётганини маълум қилди. Унинг фикрича, бундай позиция «тескари натижа беради».

Azerbaijan Airlines самолётининг қулаши ва Россиянинг содир бўлган воқеа учун айбини тан олмаслиги Москва ва Боку ўртасида дипломатик жанжал ва совуқликка олиб келган.

Тайёрлаган: Сардор Юсупов

#Илҳом Алиев #Россия #Озарбойжон