Трамп ва Путин учрашуви: бу нима эди?

АҚШда Трамп ва Путин ўртасида узоқ кутилган учрашув бўлиб ўтди. Тахмин қилганимиздай, учрашувда ҳеч нарса бўлмади. Кўпчиликда бир савол: бу нима эди ўзи? Икки президент шунча одамни сарсон қилиб нега кўришди ўзи? Журналистлар олдига чиқиб ҳеч қандай келишув бўлмади дейиш учунми? Лекин уч соатлик учрашувда нималардир бўлгани аниқ. Қуйида шу ҳақда.

{Yii::t(}

Ўтказиб юбориш 6s

Ўтказиб юбориш

Дабдабали қабул

Демак, аввало учрашув қандай бошланганига тўхталсак, чунки томонлар кайфиятини билиш учун бу жуда муҳим. Трамп Путинни дабдабали кутиб олди десак бўлади. Тўғри, аэропортда фахрий қоровул саф тортиб, ҳарбий оркестр Россия мадҳиясини чалмади. Кичкина болалар йўлак ташкил қилиб, Россия ва АҚШ байроғини ҳилпиратмади, Трамп Путинга нон ва туз ҳам тутмади, лекин Америка президенти кимнидир шахсан аэропортда кутиб олганининг ўзи – дабдаба.

Путиннинг оёқлари остига гилам тўшашди, худди СССР байроғи каби алвон рангдагисидан. Америкалик ҳарбийлар Путиннинг самолёти яқинлашганда, гиламни қайта-қайта тозалаб чиқишди. Трамп Путинни жуда илиқ кутиб олиб, хуш кайфиятда чақчақлашди. Кейин афтидан протоколда белгиланмаган бўлса-да, Путинни ўзининг лимузинига таклиф қилиб, учрашув жойига бирга борди. Совуқ уруш давридан буён энг ёмон муносабатларни бошдан ўтказаётган АҚШ ва Россия президентлари учрашувида бундан ортиғини кутиб бўлмайди.

Самарасиз учрашув

Учрашув жойига етиб боришганда журналистлар президентларни саволларга кўмишди. Ҳамма бирданига савол берди, баъзилар ҳатто додлаб гапирди. Россиялик журналистлар америкалик ҳамкасблари додлаганини тартибсизлик сифатида кўрсатишга уринишди, лекин океан ортида бу оддий ҳол. У ерда муҳим учрашувлар шундай бошланади. Кейин кимдир келиб ҳаммани тинчитади-да, сокин савол-жавоб бошланади. Демократия дейишади бунинг номини, товариш журналистлар. Америкада шунақа, бировнинг оғзини ёпишга одатланишмаган, саволларни ҳам ташкилотчи билан келишиш шарт эмас.

Демак, Трамп ва Путинни суратга, видеога олиб бўлишгач, журналистларни чиқариб юборишди. Кейин ёпиқ музокаралар бошланди. Унда ҳар икки томондан уч кишидан қатнашди. Ёпиқ музокара кутилганидан анча тез – уч соатда якунланди. Лекин кўпчилик хавотирланганидек, икки дақиқада ҳам тугамади. Эсингизда бўлса, Трамп Путин нима истаётганини икки дақиқада билиб оламан, бу вақтда у урушни тугатишни истамаётганини тушунсам, учрашувни якунлайман, деганди.

Учрашувдан кейин ўтказилган матбуот анжуманида ҳеч қандай аниқ гап айтилмади. Трамп келишув бўлмагани, бу учун ҳали Путин билан яна учрашиши кераклигини айтди. Қизиғи, учрашувдан кейин брифингда биринчи бўлиб меҳмон Путин гапирди. Одатда мезбон президент гапириб, кейин меҳмонга сўз берарди. Бу ҳолат ҳатто Трампни қўлловчи Fox News телеканалини ҳам ҳайрон қолдирди.

Энди нима бўлади?

Трамп учрашувдан кейин Fох New'sга интервю берди, кейин Америка нашрлари учрашув ҳақида инсайдлар эълон қилди. Улардан бир хулосага келиш мумкин: Трамп душанба куни Зеленский билан Оқ уйда учрашади ва унга жиддий босим қилади. Афтидан, Путин Трампга Донбасс устидан тўлиқ назорат исташи, Херсон ва Запорижжяда эса фронтни музлатишни истаётганини айтган. Трамп учрашувдан кейин Зеленскийга қўнғироқ қилиб, Путиннинг бу истагини етказган. Трамп учрашувдан кейин айтган бир гапи унинг кайфиятини очиб беради: «Россия кучли давлат, Украина эса йўқ». Ҳа, у очиқчасига шунақа деди. Яъни Трамп Киевни ўз ерларини Россияга топширишга ундайди. Агар рози бўлмаса, Украина жанг майдонида чинакамига ёлғиз қолади.

Бир сўз билан айтганда, икки қария бутун дунёни сарсон қилиб, катта ахборий шовқин кўтариб, бутун бошли Аляскада кўришишди-да, айланиб-ўргилиб, «энди ҳаммаси Зеленскийга боғлиқ», деб ўтиришибди. Яъни уларнинг режаси бўйича Украина президенти душанба куни Оқ уйга бориб, Трампга мамлакат ўз ерларини топширишга рози эканини айтиши керак. Айтмаса, Украинанинг бошига оғир кунларни солишади.

Ана шунақа ёмон учрашув бўлди Аляскада. Афтидан, дунё яна чегаралар куч билан ўзгартириладиган хавфли даврга кириб келди. Бу яхшилик билан тугамайди. Ҳар ҳолда ўтган аср ўртасида яхшилик билан тугамаганди...

Ўткир Жалолхонов тайёрлади.
Тасвирчи ва монтаж устаси – Фахриддин Ҳотамов.