Трамп: Украина президентининг ишлари «анча яхши кетмоқда»

АҚШ президенти Доналд Трамп 24 июн куни Оқ уйда НАТО бош котиби Марк Рютте билан ўтказган матбуот анжуманида Украинадаги уруш ҳақида фикр билдирди.

Журналистлардан бири Трампдан «Сиз Зеленский ҳозир ғалаба қозонаётганига ишонасизми?» деб сўраганида, у шундай жавоб қайтарди:

«Ҳеч бўлмаганда, у ўзини ушлаб турибди. Ҳар икки томонда ҳам кўп одамлар ҳалок бўлмоқда. Лекин менимча, унинг ишлари анча яхши кетмоқда», — деди АҚШ президенти.

Бу баёнот Трампнинг аввалги чиқишларидан фарқ қилади. Чунки у ўтган даврда бир неча бор Володимир Зеленскийни танқид қилиб, уни можарони тинч йўл билан ҳал этишга қаратилган саъй-ҳаракатларга тўсқинлик қилишда айблаган эди.

Матбуот анжуманида Трамп Европа давлатлари, хусусан Германиянинг АҚШ ва Исроилнинг Эронга нисбатан тутган сиёсати бўйича етарлича қўллаб-қувватламаётганидан ҳам норозилигини билдирди.

Унинг сўзларига кўра, Вашингтон Германия ҳукуматидан кўпроқ сиёсий қўллаб-қувватлаш кутган, аммо бу борада кутилган муносабатни олмаган. Шу билан бирга, Трамп АҚШ Германия ва Европадаги ҳарбий контингентини сақлаш учун юзлаб миллион доллар сарфлаётганини таъкидлади.

Бундан аввал «Катта еттилик» (G7) саммити доирасида Трамп Украина президенти Володимир Зеленский билан учрашган эди. АҚШ президенти мазкур мулоқотни «жуда яхши ўтди» дея баҳолаб, Россия Украина билан тинчлик келишувига эришиши лозимлигини айтган ҳамда бунинг учун қўлидан келган барча ишни қилишини билдирган.

24 июн куни кечқурунги мурожаатида Володимир Зеленский ҳам G7 доирасида муҳокама қилинган ҳарбий ва молиявий ёрдам Украинага ўз вақтида етказилса, Россияни тинчлик музокараларини танлашга мажбур қиладиган шароитни тезроқ яратиш мумкинлигини таъкидлади. Бироқ у бунинг қандай амалга оширилишига аниқлик киритмади.