Зеленский урушни «деярли дарҳол» тўхтатиши мумкин – Трамп

АҚШ президенти Доналд Трамп Украина президенти Владимир Зеленский билан учрашувдан олдин TruthSocial ижтимоий тармоғида пост жойлаб, Зеленский Россия билан урушни «деярли дарҳол» тўхтатиши мумкинлигини айтди ва шартларни келтирди.

«Украина президенти Зеленский истаса, Россия билан урушни деярли дарҳол тўхтатиши ёки урушни давом эттириши мумкин. Ҳаммаси қандай бошланганини эсланг. Обама берган Қримни қайтариб бўлмайди (12 йил олдин, битта ҳам ўқ узмасдан!). Украина НАТО аъзоси бўлмайди. Баъзи нарсалар ҳеч қачон ўзгармайди», деб ёзди у.

Трамп, шунингдек, Оқ уйда «катта воқеа» кутиб турганини айтди.

«Ҳеч қачон бир вақтнинг ўзида бунчалик кўп Европа етакчилари бирга бўлмаган. Уларни қабул қилиш мен учун катта шараф», деб ёзди у.

Шунингдек, у баъзи сенаторлар ва сиёсатчиларга ташланиб, уларни Аляскада Владимир Путин билан учрашувни нотўғри баҳолашда ва Украинадаги урушни тугатишга тўсқинлик қилишда айблади.

«Бу урушни тугатиш мумкин, ҳозир, аммо Крис Мерфи, Жон Болтон ва бошқалар каби аҳмоқ одамлар бу вазифани анча мураккаблаштирмоқда», деб ёзди АҚШ президенти.

Трамп учрашув якунлари бўйича «Путин ўзи истаган ҳамма нарсани олгани» ҳақидаги баёнотларга изоҳ берар экан, аслида «ҳеч ким ҳеч нарса олмаганини» айтди.

18 август куни Оқ уйда Доналд Трамп, Владимир Зеленский ва бир қатор Европа етакчилари иштирокида учрашув режалаштирилган. ОАВ маълумотларига кўра, Киев ва Европа АҚШ ва Россия етакчилари Аляскадаги уч соатлик суҳбат чоғида нимага келишиб олганини ҳали ҳам тўлиқ тушунмаяпти. Шунинг учун Трамп уларга шахсан изоҳ бериши кутилмоқда.