Украинанинг бош музокарачилари АҚШга жўнаб кетмоқда

Украина президенти девони раҳбари Андрей Ермак ва Украина Миллий хавфсизлик ва мудофаа кенгаши котиби Рустем Умеров 29 август куни Ню-Йоркда АҚШ президенти Доналд Трамп жамоаси билан учрашади. Бу ҳақда Украина президенти Володимир Зеленский 27 август, чоршанба куни кечки видеомурожаатида маълум қилди.

Унинг эслатишича, аввалроқ Ермак ва Умеров урушни тугатиш бўйича музокаралар ва музокараларда воситачилик қилишнинг эҳтимолий платформаларини муҳокама қилиб, Қатарда, кейин Саудия Арабистонида, 28 август куни эса Швейцарияда учрашувлар ўтказган. «Жума куни — Америка Қўшма Штатлари, Ню-Йорк, президент Трамп жамоаси билан учрашувлар», деди президент.

«Хавфсизлик кафолатлари мазмуни устида ишлаётганларнинг барчаси — кафолатларнинг ҳарбий, сиёсий, иқтисодий таркибий қисмлари жалб қилинади. Вазифа — имкон қадар тезлаштириш, бу ҳам таъсир дастагига айланиши: россияликлар дунё қанчалик жиддий эканлигини ва уруш давом этса, Россия учун оқибатлари қанчалик оғир бўлишини кўриши керак», — деди Зеленский учрашув мақсадларини тасвирлаб.