Лондон Қодировнинг онаси ва Қодиров жамғармасига қарши санкциялар киритди

Британия санкцияларининг янги пакетига 11 нафар Россия фуқароси ва юридик шахслари, жумладан Чеченистон раҳбарининг онаси Аймани Қодирова, Ахмат Қодиров жамғармаси, Кремлга яқин «Движение первых» ва «Волонтеры победы» ташкилотлари кирди.

Фото: picture-alliance/Photoshot

Буюк Британия Россиянинг учта ташкилоти ва саккиз нафар шахсга нисбатан санкциялар киритди. Рўйхатлар Лондондаги ТИВ сайтида эълон қилинди. Ташқи ишлар вазирлиги маълумотларига кўра, янги санкциялар «Россияда мавжуд бўлган украиналик болаларга мажбурий мафкуравий ишлов бериш»ни қўллаб-қувватловчиларга қарши қаратилган.

Хусусан, Британия санкциялари рўйхатига Чеченистон раҳбарининг онаси Аймани Қодирова ва Ахмат Қодиров жамғармаси киритилган. Янгиланган рўйхатга кремлпараст «Движение первых» ва «Волонтеры победы» ёшлар ташкилотлари, Татаристон Республикаси бош вазири ўринбосари Лейла Фазлеева, федерал ёшлар маркази раҳбари Валерий Майоров, махсус полиция бўлинмаси чечен командири Замид Чалаев, Россия Таълим вазирлигининг «болалар ҳуқуқларини ҳимоя қилиш» соҳасидаги давлат сиёсати департаменти директори ўринбосари Анастасия Аккуратова ҳамда украиналик болаларни ўғирлаш ва Россия Федерациясига олиб кетишда иштирок этган бир қанча россиялик амалдорлар киритилган.

«Движение первых» ташкилотини яратиш тўғрисидаги қонунни Россия президенти Владимир Путин 2022 йил ёзида, Россия Украинага қарши агрессив уруш бошлаганидан тахминан олти ой ўтиб имзолаган. Путиннинг сўзларига кўра, 2025 йилда у 11 миллиондан ортиқ кишини ўз ичига олган. Рамзан Қодировнинг онаси Аймани «Россиянинг янги ҳудудлари» (Украинанинг босиб олинган ҳудудлари) аҳолисига гуманитар ёрдам жўнатиш билан шуғулланувчи Ахмат Қодиров жамғармаси президенти ҳисобланади.

Тайёрлаган: Отабек Матназаров

#Лондон #Россия #Ахмат Қодиров