Бўстон тумани ҳокимининг бирданига икки ўринбосари пора билан ушланди

Андижон вилояти Бўстон тумани ҳокимининг инвестиция масалалари бўйича ўринбосари ва қишлоқ хўжалиги масалалари бўйича ўринбосари коррупцияда айбланиб қўлга олинди.

Давлат хавфсизлик хизмати хабарига кўра, икки ўринбосар ўзаро тил бириктириб, туманда фаолият юритувчи фермер хўжалигининг 500 минг долларлик экспорт режасини фиктив операциялар орқали ёпиб бериш учун фуқародан 65 млн сўм пора талаб қилган.

Жорий йил август ойида Бўстон ҳокимининг қишлоқ хўжалиги масалалари бўйича ўринбосари аванс тариқасида 25 млн сўм олган. У қолган 40 млн сўмни ҳокимнинг инвестиция масалалари бўйича ўринбосари орқали олган вақтида ушланган.

Уларга нисбатан ЖКнинг 210-моддаси “в” ва “г” бандлари (бир гуруҳ мансабдор шахсларнинг олдиндан тил бириктирган ҳолда, тамагирлик йўли билан пора олиши) билан жиноят иши қўзғатилган ва “қамоқ” эҳтиёт чораси қўлланган.

Қайд этиш лозим, ДХХ 2024 йил июл ойида ҳам Бўстон тумани ҳокимининг қишлоқ хўжалиги масалалари бўйича ўринбосари лавозимида ишлаган 10 минг доллар пора билан ушлангани ҳақида хабар берганди.