Meta сунъий интеллект ва ўрнатилган экранга эга ақлли кўзойнакларни тақдим этди

Meta компанияси 17 сентябр куни Калифорниядаги Meta Connect конференциясида ўзининг ақлли кўзойнакларининг учта янги моделини тақдим этди, деб хабар берди CNN.

Улар: ўрнатилган экранли Meta Ray-Ban Display, батарея қуввати оширилган Meta Ray-Ban Gen 2 ва спорт билан шуғулланиш учун қулай Oakley Meta Vanguard.

Асосий воқеа Meta Ray-Ban Display кўзойнаги бўлди. Унинг ўнг линзасига билдиришномалар, хабарлар, қўнғироқлар ва илова белгиларини кўрсатадиган, шунингдек, сунъий интеллект билан ишлаш имконини берадиган кичкина экран ўрнатилган. Фойдаланувчилар мушак сигналларини ўқийдиган Neural Band билагузуги орқали кўзойнакни бошқариши мумкин бўлади. Олдинги моделларда бўлгани каби, кўзойнакни овоз билан ҳам бошқариш мумкин.

Meta Ray-Ban Display кўзойнаклари АҚШда 30 сентябрда сотувга чиқарилади ва нархи 799 доллардан бошланади (нархга Neural Band билагузуги ҳам киради). 2026 йил бошида кўзойнаклар Канада, Франция, Италия ва Буюк Британияда савдога чиқиши кутилмоқда.

Бошқа иккита кўзойнак модели, Meta Ray-Ban Gen 2 ва Oakley Meta Vanguard камера, микрофон, қулоқчинлар билан жиҳозланган ва сунъий интеллект билан овозли мулоқот қилиш имконини беради, аммо уларда экран йўқ.

Meta Ray-Ban Gen 2 кўзойнаклари аллақачон сотувда мавжуд ва нархи 349 доллардан бошланади. Oakley Meta Vanguard сотуви 21 октябрда бошланади, нархи - 499 доллар.

Meta ва Ray-Ban ҳамкорлигида ишлаб чиқилган биринчи ақлли кўзойнаклар 2021 йилда чиқарилган.