Қишлоқ хўжалигига мўлжалланган ерларда нима қуриш мумкин?

Ер кодексига мувофиқ қишлоқ хўжалигига мўлжалланган ерлар фойдаланиш турига кўра – қишлоқ хўжалиги ерларига ва қишлоқ хўжалигига хизмат кўрсатувчи ерларга ҳамда сув билан таъминланиш даражасига кўра – суғориладиган ва суғорилмайдиган ерларга бўлинади.

Қишлоқ хўжалигига мўлжалланган суғорилмайдиган ерларда ички хўжалик ер тузиш лойиҳасига мувофиқ ер участкасидан фойдаланишнинг асосий турига мос келувчи объектларни жойлаштириш (қуриш)га рухсат этилади. Бу ерлар қишлоқ хўжалигига мўлжалланган ерлар деб тан олинади. 

Суғорилмайдиган қишлоқ хўжалиги ерларида ер участкасидан рухсат этилган фойдаланишнинг асосий турига мос келувчи объектларни жойлаштириш (қуриш)дан олдин ариза берувчида ижара ҳуқуқининг мавжудлиги, ер участкасининг умумий майдони, шу жумладан қишлоқ хўжалиги ерлари ва улар таркибидаги суғориладиган ерлар майдони тегишли ахборот тизимлари орқали текширилади.

Шунингдек, ер участкаси доирасида суғорилмайдиган ерларда ер участкасидан рухсат этилган фойдаланишнинг асосий турига мос келувчи объектларни жойлаштириш (қуриш) назарда тутилган.

Енгил қурилмалар ва вақтинча иншоотларни жойлаштириш (қуриш)ни назарда тутувчи ички хўжалик ер тузиш лойиҳалари туман (шаҳар)лар ҳокимлари томонидан тасдиқланади, капитал бино ва иншоотлар ҳисобланган қурилиш объектларини жойлаштириш (қуриш)ни назарда тутувчи ички хўжалик ер тузиш лойиҳалари Қорақалпоғистон Вазирлар Кенгаши раиси, вилоятлар ҳамда Тошкент шаҳри ҳокимлари томонидан тасдиқланади.

Объектлар жойлаштирилган (қурилган) қишлоқ хўжалигига мўлжалланган суғорилмайдиган ерлар алоҳида ер участкаларига бўлинмайди, жойлаштирилган (қурилган) объектларни алоҳида сотишга рухсат этилмайди (ер участкасининг фойдаланиш мақсадини ўзгартирмаган ҳолда унга бўлган ҳуқуқ ва мажбуриятларни объект билан бирга бошқа шахсга ўтказиш (қайта ижара бериш) ҳолатлари бундан мустасно).

Чорвачилик йўналишида ижарага берилган қишлоқ хўжалигига мўлжалланган суғорилмайдиган ерларда 1 гектардан кўп бўлмаган, лекин ижарага берилган контур майдонининг 1%идан ошмаган майдонда қишлоқ хўжалигига хизмат кўрсатувчи объектларни жойлаштиришга рухсат этилади.

Чорвачилик билан боғлиқ бўлмаган мақсадлар учун ижарага олинган ерларда ер участкасидан рухсат этилган фойдаланишнинг асосий турига мос келувчи объектларни (енгил иссиқхоналар ва совитиш омборлари, саралаш-қадоқлаш комплекслари, сувни тежайдиган суғориш технологияси объектлари ва ҳовузлар ва б.) жойлаштириш (қуриш) учун рухсат этилган майдон 20 гектардан ошмаслиги, лекин ижара контури майдонининг 1 фоизидан кўп бўлмаслиги керак.