Тўдабошиси ноаниқ «оқ бўрилар». Мундиалга ким билан борамиз?

Ўзбекистон миллий жамоаси бош мураббийи масаласи ҳамон мужмал. ЎФА ҳамон хорижлик (!) мураббий излаб чарчамаяпти, Темур Кападзе Англия клубларида меҳмон бўлди.

{Yii::t(}

Ўтказиб юбориш 6s

Ўтказиб юбориш

Қолайми айтинг, кетайми мен?

Эсингизда бўлса, аввалроқ ЎФА миллий жамоа бош мураббийлигини Паулу Бенту ва Йоахим Лёвга таклиф қилиб, улардан рад жавобини олгани ҳақида хабарлар чиққанди. Бенту Тошкентга келди ҳам. Лекин португалиялик мутахассис афтидан шунчаки пойтахтни айлангани келган кўринади, бўлмаса у билан шартнома имзолангани эълон қилинарди.

Шу кунларда ЎФА бош мураббийлик таклифи билан 2006 йилги жаҳон чемпиони, ўша йилги «Олтин тўп» соҳиби Фабиу Каннаварога ҳам алоқага чиқиб, рад жавоби олгани ҳақида хабар тарқалди. Бу ҳақда Романо ҳам ёзди. Бу кетишда ЎФАдагилар Клоппдан бошқа ҳамма бекор юрган мураббийларга алоқага чиқиб кўришади чоғи.

Бу орада миллий жамоани жаҳон чемпионатига олиб чиққан мураббий Темур Кападзе Англияда ўзига хос турне ўтказмоқда. Унинг «Манчестер Сити» машғулотига боргани, «Энфилд»да юргани акс этган расмлар тарқалди. Кападзе бу клубларга шунчаки айлангани борганми ёки уларнинг мураббийларидан бирор нарса ўрганишгами, билмадим. Лекин Уругвайга қарши ўртоқлик ўйинига миллий жамоани Кападзе олиб бориши аниқ.

Айтганча, 13 октябр Уругвайга қарши ўртоқлик ўйинида майдонга тушамиз. Яъни миллий жамоа жаҳон чемпионатига тайёргарликнинг асосий қисмини бошламоқда. Лекин ҳамон бизни тарихдаги илк мундиалга ким олиб бориши аниқ эмас. Ваҳоланки олдида расмий ўйини бўлмаган биз каби жамоалар узоқ танаффусдан фойдаланиб аниқ режа асосида мусобақага тайёрланиши керак. Таркиб шаклланган, чемпионатда ўзини кўрсатаётган футболчилар ўртоқлик ўйинларида синовдан ўтказилавериши керак.

Айтайлик, ҳозир Кападзе кимларни ўйнатишини билади, лекин ЎФАдагилар истаётган хорижлик (!) келса, бу таркиб унга ёқмаслиги мумкин. Кейин қайтадан ўйинни шакллантириш учун вақт етадими ёки «ўзбекчасига» тахмин, таваккал ўйин ўйнаб қайтамизми?

Футболчилар нега жим?

ЎФА раҳбарияти негадир Кападзе билан жаҳон чемпионатига боришни истамай, хорижлик мураббий излашга тушган дейлик. Аммо етакчи футболчилар нега бу борада фикрини билдирмаяпти? Журналистлар бу ҳақда сўраса, ҳаммаси «Биз ҳал қилмаймиз, раҳбарият билади», деб жавоб бермоқда.

Йигитлар, майдонда сиз футбол ўйнайсиз, раҳбариятнинг вазифаси сиз ва мураббийга қулай шароит яратиш, эрта-индин жаҳон чемпионатига борадиган жамоага ким мураббийлик қилиши масаласини мужмаллаштириш керак эмас. Сиз бу борада дангал фикрингизни айтишингиз керак, бир-бирингизга эмас, мухлисларга. Миллий жамоа ўз номи билан миллатнинг жамоаси, унга бутун халқ мухлислик қилади. Ва мана шу халқнинг аксари ҳозир Кападзени қўлламоқда. Улар бу борада футболчиларнинг фикрини билишни истайди, раҳбариятникини эмас. Шахсан мен етакчи футболчилар Кападзени қўллаб чиқишини кутгандим, лекин афтидан орада биз билмайдиган нимадир борга ўхшайди.

Мен доим бир саволга жавоб излайман: нега миллий жамоа бош мураббийи ким бўлишини бир ташкилот ҳал қилиши керак ўзи? Бу ташкилот мухлислар фикрини, футболчилар қарашларини инобатга олмайдими? Ахир футболдаги ҳамма масала кабинетларда ҳал қилинадиган даврлар ўтди, футбол Ўзбекистондаги энг демократик соҳа, азалдан шунақа бўлган.

Майли, мураббийни танлаш ЎФАнинг истагига боғлиқ экан, бунга ҳам розимиз дейлик. Агар шундай бўлса, бу ташкилот мухлисларга ичкаридаги вазият ҳақида ҳисобот бериши шарт. Агар Кападзе қоладиган бўлса, «Ўртоқлар, сиз эшитган ҳамма гаплар миш-миш, мундиалга Кападзе билан борамиз», дейишсин. Ёки уларнинг истаги хорижлик мураббий бўлса, буни ҳам очиқ айтишсин: «Кападзега қилган хизматлари учун раҳмат, лекин мундиалга бошқа мураббий тайинлаймиз», дейишсин. Шунда Кападзе ҳам бошқа ишни кўраверади, клублар уни жон деб ишга чақиришади.

ЎФАдагилар балки Ўмон саралашни якунлагач Кейрушни олиб келишни кутаётгандир, балки яна бошқа вариант бордир. Бу ҳақда мухлислар билишга ҳақли. Хуллас, миллат жамоаси тақдирига жиддийроқ қараш керак. Унутманг, мужмаллик шубҳа-гумонга, миш-мишларга йўл очади.

Ўткир Жалолхонов тайёрлади.
Тасвирчи ва монтаж устаси — Фахриддин Ҳотамов