Осиё Кубоги-2031 кўчирилди – Ўзбекистон уни ўтказишга даъвогар эди

Осиё футбол конфедерацияси (ОФК) 2031 ва 2035 йилги Осиё Кубоги мезбонларини танлаш жараёнлари бекор қилингани ҳақида миллий федерацияларни расман хабардор этди, деб ёзди Reuters.

Турнир мезбонлигига Ўзбекистон, Тожикистон ва Қирғизистоннинг қўшма аризаси ҳам даъвогарлик қилаётган эди.

Бекор қилинишига сабаб ФИФА ташаббуси бўлиб, у қитъа турнирлари жадвалини ўзгартириш ва уларни жуфт йилларга кўчиришни таклиф қилган. Муҳокамалардан сўнг ОФК бу таклифга рози бўлди.

Нима ўзгаради?

Асосий оқибат - турнирларнинг тўлиқ кўчирилиши: Осиё кубоги-2031 энди 2032 йилга режалаштирилган, Осиё кубоги-2035 эса 2036 йилга кўчирилган. Шундай қилиб, турнирни ўтказишнинг анъанавий тизими бузилади ва мусобақалар бошқа вақт оралиғида ўтказилади. Шу билан бирга, Осиё Кубоги-2027 режа бўйича ўз муддатида бўлиб ўтади.

Осиё Кубогининг жуфт йилларга кўчирилиши яна бир муаммони келтириб чиқармоқда - бошқа конфедерацияларнинг энг йирик турнирлари билан бир вақтга тўғри келмоқда. Энди бир йил давомида қуйидаги мусобақалар ўтказилиши мумкин: Европа чемпионати (УЕФА Евро), Америка Кубоги (Copa America), Осиё Кубоги.

ФИФА нега тизимни ўзгартирмоқда?

Ўзгаришлар халқаро тақвимни марказлашган ҳолда бошқариш билан боғлиқ. ФИФА аллақачон 2030 йилгача бўлган глобал мусобақалар режасини тасдиқлаган бўлиб, унда миллий жамоалар ўйинлари учун ойналар, саралаш турнирлари, финал босқичлари ва ўртоқлик ўйинлари аниқ кўрсатилган. Ушбу тизимда ҳар бир конфедерация умумий жадвалга мослашиши керак. Осиё Кубоги қарори - мана шу катта ислоҳотнинг бир қисми.

Мезбонликка номзодлар билан вазият қандай?

Турнирлар санасининг ўзгариши мезбонликка даъвогарларнинг барча аризаларини автоматик равишда бекор қилади. Бу шуни англатадики, мезбонларни танлаш жараёни қайтадан бошланади, ҳамма янги тартибни кутишига тўғри келади. ОФК амалда икки турнирга тайёргарлик циклини қайтадан бошлайди.

2031 йилги Осиё Кубоги мезбонлигига Австралия, Ҳиндистон, Индонезия, Кувайт, Жанубий Корея, шунингдек, Ўзбекистон, Қирғизистон ва Тожикистон қўшма ариза топширган эди. Энди Ўзбекистоннинг янги турнирлар мезбонлиги учун ариза топшириши масаласи номаълум. Ҳозирча, Ўзбекистон футбол ассоциацияси (ЎФА) вазиятга муносабат билдирмади.