Reuters: Вена Дерипасканинг активларидан санкцияларни олиб ташлашни сўрамоқда

Австрия расмийлари Европа Иттифоқи Raiffeisen Bank International (RBI)га Россияда олган жаримаси учун компенсация тўлашини талаб қилмоқда. Reuters 3 октябр, жума куни европалик дипломатларга таяниб, Вена тегишли бандни Европа Иттифоқининг 19-санкция пакетига киритишни сўраётгани ҳақида хабар берди.

Шу билан бирга, россиялик олигарх Олег Дерипаскага тегишли бўлган, тахминан 2 миллиард еврога тенг бўлган Австриянинг Strabag қурилиш гуруҳининг акциялари блокдан чиқарилиши кутилмоқда. Аввалроқ Financial Times нашри манбаларга таяниб, Венанинг Strabag акцияларини блокдан чиқариш ва RBI'га топшириш талаби ҳақида хабар берган эди. Шундан сўнг, RBI акциялари Вена фонд биржасида 6 фоизга қимматлашди, деб хабар бермоқда Reuters.

Европа комиссияси ва Австрия ташқи ишлар вазирлиги агентликнинг ушбу маълумотни тасдиқлаш ҳақидаги сўровига жавоб бермади, Raiffeisen Bank International раҳбарияти эса изоҳ беришдан бош тортди.

Европа Иттифоқининг бир қанча давлатлари Австрия таклифини кескин танқид қилмоқда, дея қайд этади Reuters. «Бу яхши сигнал бўлмайди, чунки Raiffeisen ҳақиқатда Россияни тарк этиши керак эди, бироқ Германия ва Австрия кўмаги туфайли буни амалга оширмади», — дея европалик дипломатнинг сўзларини келтиради агентлик.

RBI раҳбариятига кўра, 2025 йилнинг май ойида Россия Марказий банки "Райффайзенбанка" ҳисобрақамидан тахминан 1,87 миллиард еврони рубл эквивалентида мажбуран ечиб олди ва суммани аввал Дерипаскага тегишли бўлган "Распериа" компанияси ҳисобига ўтказди. Маблағлар RBI'нинг Россиядаги шуъба корхонасига "Распериа"га товон тўлаш мажбуриятини юклаган Россия судининг қароридан кейин хатловга олинган.

"Райффайзенбанк"дан хатловга олинган сумма суд томонидан белгиланган зарарга тенг бўлиб, у ҳисобланган фоизларни ҳисобга олмаганда, тахминан 174 миллион евро. "Распериа" ушбу фоизни «исталган вақтда» мажбурий ундиришни талаб қилиши мумкин, дея аниқлик киритди Австрия банк гуруҳи.