«Барса»да йирик мағлубият, «Сити»да қийин ғалаба. Кун ўйинлари

Англия: Гвардиоланинг юбилейи

«Нюкасл» – «Ноттингҳэм Форест» 2:0
Голлар: Гимарайнс, 58 (1:0). Волтемаде, 84 – пеналти (2:0)
«Нюкасл»: Поуп, Ботман, Тшау, Берн, Триппиер, Тонали, Жоэлинтон (Майли, 90+1), Гимарайнс, Гордон (Барнс, 69), Эланга (Мерфи, 70), Волтемаде (Осула, 90+1)
«Ноттингҳэм Форест»: Селс, Куня, Морату (Баква, 77), Миленкович, Андерсон, Йейтс (Ҳатчинсон, 64), Уилямс, Савона, Гиббс-Уайт, Ндой (Ҳадсон-Одои, 64), Вуд (Игор Жезус, 64)
Огоҳлантиришлар: Йейтс, 32. Уилямс, 34. Морату, 68. Андерсон, 83

«Ноттингҳэм»даги инқирознинг охири кўринмаяпти, жамоа бошқарувига Ангелос Постекўғли келганидан кейинги давр эса — тўлиқ қора полосани эслатади. «Сент-Жеймс Парк»даги ўйиннинг биринчи бўлимини «ўрмончилар» ўз активига ёзиб қўйиши мумкин, лекин иккинчи бўлим бошидаги биринчи гол меҳмонларни синдириб қўйди. Бруно Гимараэс марказий зонада Гиббс-Уайтдан тўпни олиб қўйиб, ҳужумга қўшилган ҳимоячи Берн билан рақиб жарима майдони яқинида ўзаро девор услубида ўйнади ва тўпни қабул қилиб олгач, тўсин остига кучли зарба берди. Шундан кейин фақат Селснинг ҳаракатлари меҳмонлар учун имконият сақлаб турди, у аввалига Барнснинг яқин масофадан зарбасини тўсди, кейин эса Тшаунинг зарбасини оёқлари билан тўсиб қолди. Аммо ўйин охирларига бориб Волтемаде пеналтини бенуқсон ижро этган ҳолда ўйиндаги интригага барҳам берди. Германиялик ҳужумчи «қарғалар»га Исакнинг йўқлигини билинтирмаяпти.

«Брентфорд» – «Манчестер Сити» 0:1

Гол: Ҳоланд, 9 (0:1)
«Брентфорд»: Келлеҳер, ван дер Берг, Айер (Фабиу Карвалю, 90+2), Коллинз, Ҳики, Кайоде, Ҳендерсон (Ониека, 73), Дамсгор (Йенсен, 68), Ярмолюк (Янелт, 73), Шаде, Тиаго (Уаттара, 68)
«Манчестер Сити»: Доннарумма, Рубен Диаш, Гвардиол, О`Райли, Матеус Нунес, Родри (Гонсалес, 22), Рейндерс (Бернарду Силва, 77), Фоден, Савио, Бобб (Доку, 77), Ҳоланд
Огоҳлантиришлар: Шаде, 45. Ҳендерсон, 70. Уаттара, 84 – Матеус Нунес, 77. О`Райли, 83

Ўйин стартидаёқ Гвардиолнинг анча ичкаридан йўллаган узатмасидан кейин тўпни ўзига бўйсундириб олган Ҳоланд рақиб ҳимоячилари қаршилигини сезмасдан осонлик билан дарвозани ишғол этди. Айтиш мумкинки, бу билан норвегиялик ҳужумчи гешталтни ёпди, Лондондаги стадионларда муваффақиятли тўп сурадиган (22 ўйинда 21 гол) ҳужумчи бунгача фақат «Брентфорд» майдонида гол урмаганди. Шу билан бирга, бу Эрлинг гол урган 22-стадион бўлди (23 стадиондан). Унинг ўйинда ягоналигини сақлаб қолган голи Хосеп Гвардиоланинг юбилейи учун етарли бўлди. Испаниялик мутахассис АПЛда 250-ғалабасини нишонлади. Бунинг учун унга 349 ўйин етарли бўлди. У бу натижага эришган Арсен Венгердан кейинги иккинчи мураббийга айланди (франциялик мутахассисда 423 ўйинда шунча ғалаба бўлган). Биринчи бўлимда мезбонлар рақиб жарима майдони ичида бирор марта тўпга тегина олмади, «асаларилар»да бунақаси АПЛга чиққанидан буён бирор марта кузатилмаганди (159 игр). Лекин иккинчи бўлимда мезбонлар кучлироқ ўйин намойиш этишди ва Доннарумма оёқда ўйнаш унга хос эмаслигини эслатиб қўйди. Италиялик дарвозабон тўпни узоқлаштиришда хатога йўл қўйиб, уни рақибга топширди, унинг бахтига тўп дарвоза соҳасига тўғри бормади.

Испания: «Барса»да кичик инқироз

«Севиля» – «Барселона» 4:1
Голлар: Санчес, 13 – пеналти (1:0). Ромеро, 36 (2:0). Рэшфорд, 45 (2:1). Кармона, 90 (3:1). Адамс, 90+6 (4:1)
Аниқ ижро этилмаган пеналти: Левандовски, 76’
«Севиля»: Влаходимос, Аспиликуэта, Маркан, Суасо, Кармона, Агуме, Соу (Гудел, 61), Менди (Пеке Фернандес, 73), Варгас (Янузай, 73), Санчес (Эджуке, 90+3), Ромеро (Адамс, 61)
«Барселона»: Шченсни, Араухо (Балде, 46), Кубарси, Мартин (Гарсия, 46), Кунде, Педри, де Йонг (Кристенсен, 88), Олмо, Торрес (Баржи, 69), Рэшфорд, Левандовски
Огоҳлантиришлар: Маркан, 20. Ромеро, 50. Янузай, 74. Агуме, 81. Пеке Фернандес, 90 – Мартин, 16. Торрес, 21. де Йонг, 38. Рэшфорд, 84

«Барселона» бир ҳафта ичида иккинчи бор, ла лигада эса илк марта ютқазди. Амалдаги чемпионлар «Севиля» майдонида сенсацион равишда тор-мор этилди.

«Барса»га бу ўйинда жароҳат туфайли Ямал ёрдам бера олмасди. Унинг ўрнига ўнг қанот вингери позициясига Рэшфорд туширилди, Торрес чап қанотдан жой олди, марказий форвард ролини сафга қайтган Левандовски бажарди. Шунингдек, «ПСЖ» билан ўйинда марказий ҳимояда ўйнаган Эрик Гарсия ўз ўрнини Араухога бўшатиб берди.

Ҳанс-Дитер Флик ўз ихтиёридаги энг кучли таркибни жангга ташлаган бўлса-да, жамоа мезбонлар босимига дош бера олмади. Шу куни «Барселона»ни умуман таниб бўлмай қолди, мезбонлар биринчи бўлимда тўлиқ устунликка эришди ва рақиб ҳимоя чизиғи доимгидек ўта юқори жойлашганидан фойдаланиб, икки тўп фарқи билан олдинга чиқиб олишди. Меҳмонлар рақиб тезлигига улгура олмади ва фоллар ишлатишга мажбур бўлди. Шундай вазиятлардан бирида Араухо жарима майдони ичида Исак Ромерога ишлатган фол учун пеналти белгиланди, каталонияликларнинг собиқ ҳужумчиси Алексис Санчес аниқ зарба билан ҳисобни очди. Ромеро ҳисоб 1:0 ҳолатида ҳет-трик қайд этиши ҳам мумкин эди, аммо биргина гол билан чекланди.

«Барса»ни ла лига ўйинларида ўн йилдан буён енга олмаётган «Севиля» шу куни катта иштиёқ билан майдонга тушганди. Аммо меҳмонлар ўйинда бурилиш ясаши ҳам мумкин эди. Рэшфорд биринчи бўлимга қўшиб берилган еттинчи дақиқада Педрининг ажойиб пасидан кейин ҳаводаги тўпни тўхтатмасдан идеал зарба берди ва ҳисобни қисқартирди. Иккинчи бўлимда ҳисоб тенглашиши ҳам мумкин эди. Балде Рэшфорд билан «девор» услубида ўйнаб, жарима майдонига ёриб кирганида Янузай уни қўллари билан газонга йиқитди. «Рамон Санчес Писхуан»даги трибуналар карахт ҳолатга тушганди, аммо Левандовски тўпни қийшиқ тепганида маҳаллий мухлислар байрамни давом эттиришди.

«Барселона» вазиятни ўнглашга ҳаракат қилишда давом этди ва якунда зарбалар сони бўйича «Севиля»дан ўзиб кетди ҳам (17:13). Аммо сўнгги дақиқаларда Кармона ва Адамс қарши ҳужумларда ҳисобни йирик кўринишга келтириб қўйишди. Натижада Флик бошқаруви даврида илк бор уч тўп фарқи билан ютқазган «Барса» турнир жадвалида иккинчи ўринда қолди.

«Селта» – «Атлетико» 1:1

Голлар: Старфелт, 6 – автогол (0:1). Аспас, 68 (1:1)
«Селта»: Раду, Старфелт, Алонсо, Х. Родригес, Белтран (У. Алварес, 55), Д. Родригес, Каррейра (Мориба, 84), Мингеса, Ҳутгла (Аспас, 63), Сведберг (Сарагоса, 63), Иглесиас (Дуран, 84)
«Атлетико»: Облак, Лангле, Ле Норман, Ганцко, Лиоренте, Коке (Галлаҳер, 77), Барриос, Гонсалес, Симеоне (Молина, 82), Гризманн (Галан, 46, Баэна, 76), Х. Алварес (Серлот, 82)
Огоҳлантиришлар: Иглесиас, 65 – Лангле, 25. Баэна, 78
Четлатиш: Лангле, 40 (иккинчи сариқ)

Ниҳоят ғалабали йўлга тушиб олган «Атлетико» Вигодаги ўйиннинг 40-дақиқасидаёқ Лангленинг иккинчи бор сариқ карточка олиши туфайли озчилик бўлиб қолишди, аммо бу вақтга келиб «матрасчилар» ҳисобда олдинда бораётганди. Гризманнинг ажойиб пасидан кейин ҳимоячилардан қочиб кетган Пабло Барриос рақиб ҳимоячиси Старфелтни ўз дарвозасини ишғол этиб қўйишга мажбур қилди. Аммо «Селта» бир киши кўп бўлиб ўйнаганида мағлубиятдан қутулиб қолди, ўйиннинг иккинчи бўлими ўрталарида 38 ёшли Аспас ҳисобни тенглаштирди. Яго гол урмаса ҳам бўлмасди, у шу куни галисияликлар жамоасидаги 533-ўйинида майдонга тушганди ва бу билан Манолога тегишли бўлган клуб рекордини такрорлаганди.

\

Италия: «Наполи» ва «Рома» илгарилаб кетмоқда

«Фиорентина» – «Рома» 1:2
Голлар: Кин, 14 (1:0). Соуле, 22 (1:1). Кристанте, 30 (1:2)
«Фиорентина»: де Хеа, Мари (Комуццо, 75), Раниери, Понграчич, Мандрагора (Жеко, 75), Николусси Кавиля, Гозенс, Додо (Фортини, 81), Гудмундссон (Пикколи, 46), Фаццини (Ндур, 67), Кин
«Рома»: Свилар, Манчини, Н`Дика, Зеки Челик, Кристанте, Коне, Цимикас (Ренч, 68), Уэсли Винисиус (Циолковски, 81), Соуле (Ал-Айнауи, 81), Балданци (Пеллегрини, 59), Довбик (Дибала, 59)
Огоҳлантиришлар: Гудмундссон, 43. Мари, 70 – Кристанте, 3. Цимикас, 65. Уэсли Винисиус, 68

Ўтган ҳафта ўртасида Европа лигасида ютқазиб қўйган «Рома» ички чемпионатда ғалабали юришини давом эттириб, Флоренциядан ҳам уч очко билан қайтди. Бу «бўрилар» ўз тарихида учинчи марта чемпионат стартидаги дастлабки учта сафар ўйинида ғалаба қозониши бўлмоқда. Якшанба кунги ғалаба ижодкори Соуле бўлди, «Лилл» билан ўйинда пеналтини аниқ ижро эта олмаган футболчи айбини тўлиқ ювди. Аргентиналик ҳужумкор яримҳимоячи аввалига навбатдаги марта жарима майдони ташқарисидан йўллаган зарбаси (А Серияда бу борада унинг тенги йўқ) билан ҳисобни тенглаштирди. Кейин эса унинг ижросидаги корнердан кейин Кристанте бош билан дарвозани ишғол этиб, ғалабани таъминлади. «Фиорентина» Стефано Пиоли қўли остида мавсум стартида муваффақиятсизликка учраган бўлса (жамоа 6 турда 3 дуранг ва 3 мағлубият қайд этган), Жан Пиеро Гасперини бошчилигида римликлар 6 турда 5 ғалабага эришди ва онлайн режимда турнир жадвалининг биринчи ўрнига чиқиб олишди.

«Наполи» – «Женоа» 2:1
Голлар: Эхатор, 34 (0:1). Замбо Ангисса, 57 (1:1). Ҳойлунд, 75 (2:1)
«Наполи»: Милинкович-Савич, Жуан Жезус, Бекема, Оливера (Спинаццола, 50), Ди Лоренцо, Лоботка (Гилмор, 44), Мактоминай, Замбо Ангисса, Нерес (Гутеррес, 82), Политано (Де Брейне, 50), Ҳойлунд (Лукка, 82)
«Женоа»: Леали, Васкес, Маркандалли (Отоа, 46), Сабелли (Карбони, 76), Нортон-Каффи, Френдруп, Масини, Малиновский (Торсби, 61), Витиня (Коломбо, 76), Эллертссон, Эхатор (Экубан, 61)
Огоҳлантиришлар: Нерес, 55 – Маркандалли, 28. Малиновский, 38. Отоа, 63

«Наполи» эса «Женоа»га қарши ўйиннинг биринчи бўлимида ҳисобда ортда борди ва «Рома» мухлислари ўз севимли жамоаси биринчи ўринда қолишига ишона бошлашди. Қолаверса, ўйини чиқмаётган неаполликлар сафида Лоботка жароҳат туфайли алмаштирилди. Аммо Антонио Конте танаффусда жамоани ўзига келтира олди. Иккинчи бўлимда неаполитанликлар катта куч билан олдинга ташланди ва Замбо-Ангисса ҳисобни тенглаштирди. Кейин эса Италияда ўзининг энг яхши формасига қайтган Расмус Ҳойлунд ғалаба голини урди ва «Наполи»ни биринчи ўринга қайтарди.

«Ювентус» – «Милан» 0:0
Аниқ ижро этилмаган пеналти: Пулишич, 53’
«Ювентус»: Ди Грегорио, Ругани (Костич, 86), Келли, Гатти, Локателли, Маккенни, Камбиясо, Калюлю, Консейсау (Тюрам, 68), Кенан Йилдиз (Влаҳович, 68), Давид (Опенда, 68)
«Милан»: Менян, Габбиа, Павлович, Томори, Рабио, Модрич, Фофана (Лофтус-Чик, 63), Бартесаги, Салемакерс, Хименес (Леау, 63), Пулишич (Нкунку, 74)
Огоҳлантиришлар: Локателли, 49. Гатти, 74 – Фофана, 45. Бартесаги, 59

Якшанба оқшомидаги марказий баҳсда эса жамоалар «футболча шахмат» ўйнашди. Игор Тудор ва Массимилиано Аллегри бир-бирининг жамоасини чуқур ўрганишганини намойиш этишди. Жамоалардан бири гол ура олганида ўйин очилиб кетиши ҳам мумкин эди, аммо Дэвид Маккеннининг оригинал пасини кутмагани маълум бўлди, Сантяго Хименес Павловичнинг қанотдан узатмасига бошини қўйганида эса тўп дарвоза устуни ёнгинасидан ўтиб кетди. Иккинчи бўлимда эса Менян Гаттига бир неча метр масофадан гол уришга йўл қўймади.

Бундай вазиятда Модрич катта саҳнага чиқди ва тўпни ҳимоячилар ортига етказиб берди, тўпга етиб борган Хименесни эса Келли ортдан туртиб йиқитди. Пеналтини Луканинг ўзи ижро этганда яхшироқ бўларди, нуқтага яқинлашган Пулишичнинг асаблари эса дош бера олмади ва тўп юқоридан ўтиб кетди. Кейинроқ Рафаэл Леау ҳам драматик вазият қаҳрамонига айланди. Португалиялик ҳужумчи дарвозабон ҳудудида туриб аниқ зарба бера олмади. Бу дуранг Неапол ва Римдаги жамоалар учун ҳақиқий совға бўлди.