Лос-Анжелесдаги даҳшатли ёнғин иши бўйича гумонланувчи қўлга олинди

Флорида штатида яшовчи 29 ёшли Жонатан Риндеркнехт январ ойида Лос-Анжелесда йирик ёнғинга олиб келган қасддан ўт қўйишда гумон қилиниб, қўлга олинди, деб хабар берди АҚШ Адлия вазирлиги 8 октябр куни.

Тергов версиясига кўра, Uber ҳайдовчиси бўлиб ишлаган Риндеркнехт 1 январ куни Лос-Анжелес шимолидаги Пасифик-Палисайдс сайёҳлик йўлагида дарахтларга ўт қўйган.

Дастлаб ёнғин майдони нисбатан кичик бўлган, аммо кучли шамол туфайли ёнғиннинг тарқалиши ошган.

Оқибатда ёнғин майдони тахминан 93 квадрат километрни ташкил этди. Ёнғин Тинч океани, Малибу ва Санта-Моника тоғларига таъсир қилди. 12 киши ҳалок бўлди, 6800 дан ортиқ бино вайрон бўлди.