Доналд Трамп Исроил парламентида нутқ сўзлаши ҳақида маълум қилди

АҚШ президенти Доналд Трамп Яқин Шарққа сафари доирасида Исроил парламентида (Кнессет) нутқ сўзлайди ва Мисрга ташриф буюради. «Мен Исроилга кетяпман. Ўйлайманки, тез орада Кнессетда чиқиш қиламан. Кейин эса Мисрга йўл оламан», — деди Трамп 10 октябр, жума куни Оқ уйда. У ташрифларнинг саналарига аниқлик киритмади. Сафар 12 октябр куни бошланиши, дастлабки маълумотларга кўра, 14 октябр оқшомига АҚШга қайтиш режалаштирилган.

Бир кун аввал Кнессет спикери Амир Оҳана Америка президентига Исроил парламентида чиқиш қилиш учун расмий таклиф юборган эди. «Исроил тинчлик президентини кутмоқда», деб ёзган Оҳана X ижтимоий платформасида. У Трампни «яҳудий халқининг замонавий тарихдаги энг буюк дўсти ва иттифоқчиси» деб атаган.

Исроил ва Фаластиннинг ҲАМАС гуруҳи ўртасидаги ўт очишни тўхтатиш келишуви 10 октябр куни соат 12:00 да кучга кирди. Доналд Трамп томонидан ишлаб чиқилган ва ҳар икки томон қўллаб-қувватлаган Ғазо режасининг биринчи босқичида фаластинлик маҳбуслар эвазига қолган исроиллик гаровга олинганларни озод қилиш кўзда тутилган.

Барча гаровга олинганларни озод қилиш эвазига Исроил умрбод қамоқ жазосини ўтаётган тахминан 250 нафар фаластинликни ва 2023 йил 7 октябрда Исроил ва ҲАМАС ўртасидаги уруш бошланганидан бери ҳибсга олинган тахминан 1700 нафар бошқа маҳбусни озод қилади. Шартнома шунингдек, Исроил мудофаа кучлари (ЦАҲАЛ) қўшинларини Ғазо секторидаги келишилган чизиққа олиб чиқишни ҳам назарда тутади.

«Бу Исроил учун жуда катта иш, аммо бу ҳамма учун — араблар учун, мусулмонлар учун, ҳамма учун, бутун дунё учун ажойиб иш», — деди Трамп. «Ҳамма бу келишув амалга ошишини хоҳлайди», деб таъкидлади у.

Бошқа нарсалар қаторида Ғазо секторига янги гуманитар ёрдам етказилишини кўзда тутувчи сулҳ аллақачон кучга кирган. Бироқ, барқарор тинчликка эришишга қаратилган кейинги қадамлар ҳали якунлангани йўқ.