Зеленский АҚШ етказиб берган тақдирда Tomahawk учун нишонларни айтди

Украина президенти Володимир Зеленский 12 октябр, якшанба куни Fox News телеканалига берган интервюсида, агар АҚШ ўз мамлакатига узоқ масофага учувчи Tomahawk («Томагавк») қанотли ракеталарини тақдим этса, улардан Россия тинч аҳолисига ҳужум қилиш учун фойдаланилмаслигини айтди.

«Фақат ҳарбий нишонлар. Биз ҳеч қачон уларнинг тинч аҳолисига (россияликларга) ҳужум қилмаймиз», деди Зеленский якшанба куни The Sunday Briefing дастури эфирида.

12 октябр куни Зеленский икки кун ичида АҚШ президенти Доналд Трамп билан иккинчи суҳбатини ўтказди. Украина раҳбари, бир кун олдин бўлгани каби, суҳбатни «жуда самарали» деб атади. «Кеча биз бугунги кун учун аниқ мавзу бўйича келишиб олдик ва вазиятнинг барча томонларини кўриб чиқдик», деб ёзди у.

Axios маълумотларига кўра, 11 октябр куни бўлиб ўтган суҳбат чоғида Tomahawk'нинг эҳтимолий етказиб берилиши мавзуси ҳам кўтарилган. «Россия америкаликлар бизга «Томагавклар» бериши мумкинлигидан қўрқишини кўряпмиз ва эшитяпмиз. Бу айнан шундай босим тинчликка ҳисса қўшиши мумкинлигидан далолатдир», — деб ёзди Зеленский якшанба куни суҳбатдан сўнг.