Латвияда украиналикларга таҳдид қилган шахсга нисбатан жиноий иш очилди

Латвия ҳуқуқ-тартибот идоралари Швейцариядаги поездда украинзабон оилага таҳдид қилган мамлакатнинг русийзабон фуқаросига қарши жиноий иш очди. Аниқроғи, у ўзини рус деб атаган ва «Сизларни ўлдирамиз» деган.

Фото: AP

Латвия Давлат хавфсизлик хизмати Швейцарияда поездда украин-беларуслар оиласини оғзаки ҳақорат қилган, сўнг уларга ҳужум қилган русийзабон фуқарога нисбатан жиноий иш очди. Тегишли баёнот 17 октябр, жума куни махсус хизмат сайтида эълон қилинди.

14 октябр куни Украина фуқароси Елена Дудникнинг Instagramʼдаги саҳифасида Берн кантонида Интерлакендан Шпицга кетаётган поездда бир кун олдин содир бўлган воқеа акс эттирилган беш дақиқалик видеони кўриб чиқиш натижасида миллий ва этник адоват қўзғатиш моддаси бўйича иш очилди.

Елена, унинг турмуш ўртоғи, Швейцариядаги Беларус оиласида туғилиб ўсган Габриэл Шаров ва фарзанди поездда кетаётганида ёнларида ўтирган рус тилида сўзлашувчи эркак уларга тажовузкорона мурожаат қила бошлаган. Бу Елена эри билан украин тилида гаплашганидан кейин содир бўлган.

Хусусан, эркак ўзини «рус одами» деб таъкидлаган ва унинг «окопда йигитлари ўтирганини» айтган. Видеода «Сизларни охиригача ўлдирамиз!» деган таҳдид ҳам бор. У, шунингдек, оила ишсиз эканлигини ва у «солиқ тўлаган» мамлакатда «нафақа ҳисобидан яшаётганини» таъкидлаган. У қўполлик билан фарзанди «руҳий зарар кўрмасдан туриб» вагонни тарк этишларини талаб қилган.

Габриэлга мурожаат қилиб, у нима учун «окопларда» эмаслигини сўраган ва Швейцария паспортини кўрсатишни талаб қилган. Габриэл полицияга қўнғироқ қиляпти деб ўйлаганида, у: «Полицияни чақиряпсанми? Мен сени ўзим синдираман!» - деган.

Бундан ташқари, эркак Швейцария фуқароси эканлигини ва агар полицияга мурожаат қилса, Елена ва Габриэл депортация қилинишини айтган. Шунингдек, у бир неча бор Еленадан телефонида суратга олган видеони ўчириб ташлашни талаб қилган. Видео йўловчининг Габриэлга ҳужум қилиши билан тугайди. DW Швейцариянинг Берн кантонидаги полицияга сўров юборди.