Россия томонда жанг қилган ўзбекистонлик украин дронига асир тушди

Ўзбекистон фуқароси, Россия томонда туриб жанг қилган Зуҳриддин Йўлдошев Украина дрони томонидан асир олинди. Унинг ўзи бу ҳақда NEXTA телеграм-каналида эълон қилинган видеороликда айтиб ўтган.

Бухородан бўлган 31 ёшли шахснинг айтишича, у гўёки гиёҳванд модда ташишда айбланганидан кейин РФ армияси билан шартнома имзолашга мажбур бўлган – акс ҳолда у 12 йилдан 18 йилгача бўлган муддатга қамалиши мумкин эди.

У элчихона билан боғланишга имкон берилмагани, унда фақат икки йўл қолгани – қамоқ ва фронтдан бирини танлашга тўғри келганини айтиб ўтган.

Ўзининг айтишича, у олдинги чизиққа бориши билан дарҳол таслим бўлган: украин дрони уни биринчи бўлиб пайқаганидан кейин асирга олган.

Йўлдошев рация ва бошқа жиҳозларни ўз ҳисобидан сотиб олишига тўғри келгани, Россия армиясида «хаос ва алдов» ҳукмрон экани ҳақида гапирган. Унинг сўзларига кўра, позицияда ҳалок бўлган аскарлар жасади шунчалик кўпки, «оёқ қўйишга жой топилмайди».

У Россияга қайтмоқчи эмас ва Ўзбекистон ҳукуматидан уйга қайтишда ёрдам сўрамоқда.