Еврокомиссар: Россиядан газ импортини бутунлай тўхтатиш керак

Европа Иттифоқи кенгаши ва Европарламент йил охиригача Россия газини импорт қилишни тақиқловчи қонун лойиҳасининг якуний варианти устидаги ҳамкорликдаги ишларини якунлаши мумкин. Бу ҳақда Дания энергетика вазири Ларс Аагард 20 октябр, душанба куни ЕИ кенгашининг энергетика бўйича йиғилиши якунлари юзасидан ўтказилган матбуот анжуманида маълум қилди.

«Биз жорий йил охиригача бу қонун лойиҳасини тайёр бўлишини истаймиз, шунда уни амалга ошириш мумкин», деди Ааград ва «ҳамма Россия газига қўйилган тақиқнинг кучга киришини кўришни хоҳлайди», деб қўшимча қилди. Унинг таъкидлашича, янги қонун қабул қилингандан сўнг «Россиянинг Европа Иттифоқи энергия истеъмолчиларига газ сотиш қобилиятини амалда тўхтатади». «Биз пулимизни Россияга жўнатишни тўхтатамиз», деб таъкидлади Дания вазири.

20 октябр куни ЕИ кенгаши йиғилишида аъзо давлатлар энергетика вазирлари даражасида Россия газини импорт қилишни тақиқловчи қонун лойиҳаси бўйича ўз позициясини кўпчилик овоз билан маъқуллади. Ҳужжат Европа Иттифоқининг REPowerEU йўл харитасининг марказий элементи бўлиб, Россия энергетикасига қарамликни тугатишга қаратилган. ЕИ кенгаши Россия газидан босқичма-босқич воз кечишни қўллаб-қувватлади: 2025 йил 17 июндан кейин тузилган янги шартномалар бўйича газ етказиб беришни тақиқлаш 2026 йил 1 январдан кучга киради.

Бироқ, амалдаги шартномаларга ўзгартиришлар фақат денгизга чиқиш имкони бўлмаган аъзо давлатлар учун рухсат этилади. Бу давлатлар Венгрия ва Словакиядир. ОАВ хабарларига кўра, бу икки давлат Европа Иттифоқи кенгашида қонун лойиҳаси учун овоз бермаган.