АҚШ Колумбия президенти Густаво Петрога қарши санкциялар жорий қилди

Вашингтон томони Петрони «наркокартелларни гуллаб-яшнашга қўйиб берганлик ва улар фаолиятини тўхтатишдан бош тортганлик»да айбламоқда. Шу билан бирга, Колумбияда Петронинг ўғли отасининг сайловолди кампанияси учун гўё наркосавдогардан пул олганликда айбланмоқда, деб ёзади AFP. Бу иш ҳали судда кўрилмаган.

Густаво Петро 2022 йилда ҳокимиятга келиб, инаугурация нутқидаёқ давлат наркокартеллар билан урушдан жиддий заифлашганини, ҳукумат эса гуруҳлар билан музокара йўлини афзал кўришини айтган эди.

АҚШ президенти Дональд Трамп бу ёндашувни танқид қилиб, Петродан «гиёҳванд моддаларга қарши уруш»ни қайта бошлашни талаб қилган.

«Бир қадам ҳам орқага чекинмайман ва тиз чўкмайман», — деб ёзди Колумбия президенти АҚШ Молия вазирлиги қарорига изоҳ бериб. Шу билан бирга, Петро авваллари Қўшма Штатлар иттифоқчиси сифатида танилган эди.

Колумбия ИИВ раҳбари Армандо Бенедетти янада кескин баёнотлар берди. Унга кўра, Вашингтон қароридан «ҳар қандай империя адолатсиз экани» кўриниб турибди: «АҚШ учун зўравонликка қарши баёнот — наркосавдогар бўлиш билан баробар. Гринголар (Лотин Америкасида хорижий, инглизча сўзлашувчи кишиларга нисбатан ишлатиладиган атама — таҳр.), уйингизга қайтинг», — дея келтиради ОАВ унинг сўзларини.

Петро шунингдек, Колумбия пойтахтида Трамп сиёсатига қарши намойишлар ўтказишга чақирди. У бу сиёсатга АҚШ ҳарбий кучларининг гўё наркокартелларга тегишли бўлган Колумбия кемаларига берган зарбалари ҳам киришини айтди. Икки ой ичида АҚШ шундай 10 та кемани йўқ қилган ва уларда бўлган камида 43 кишини ўлдирган. Петро бу ҳаракатларни «суддан ташқари қатл этиш» деб атаб, америкалик ҳарбийларни бундай кескин чоралардан тийилишга чақирган. Бунга жавобан Трамп колумбиялик ҳамкасбини «бандит» деб атади ва мамлакатга наркотрафикка қарши курашдаги қўллаб-қувватловни тўхтатишини эълон қилди.

Колумбия билан муносабатларда кескинлик кучайган бир пайтда — бу мамлакат АҚШнинг наркотрафикка қарши курашида узоқ йиллар таянч нуқтаси ва Жанубий Америкадаги бош иттифоқчиларидан бири бўлиб келган — Пентагон минтақaга дунёдаги энг йирик ҳарбий кемалардан бири, Gerald R. Ford' атом авиаташувчисини юборишини маълум қилди. Reuters таъкидлашича, бу АҚШнинг минтақадаги энг йирик куч намойиши ҳисобланади.

Пентагон вакилининг айтишича, авиаташувчининг аниқ қачон жойлаштирилиши ҳозирча ошкор этилмаган. Лотин Америкаси сувларида аллақачон камида саккизта АҚШ ҳарбий кемаси (бортда F-35 қирувчилари билан) ва атом сувости кемаси бор. АҚШ ҳарбий кучларининг бундай концентрацияси Венесуэла президенти Николас Мадурони хавотирга солмоқда, деб ёзади Reuters. Бу орада Вашингтон Мадурони қўлга туширишга ёрдам берганлар учун 50 млн доллар мукофот эълон қилди — АҚШ Адлия вазирлиги унга наркотик моддаларни ноқонуний айланмаси бўйича айб қўйган.