ОАВ: АҚШ Венесуэла президентини ўғрилаш учун унинг учувчисини ёллашга уринди

АҚШ Ички хавфсизлик вазирлиги ходими Венесуэла президенти Николас Мадуронинг асосий учувчисини ёллашга уринди. У мамлакат раҳбарини Қўшма Штатлар ҳибсга олиши мумкин бўлган жойга етказиши керак эди. Бу ҳақда Associated Press агентлигига амалдаги ва собиқ амалдорлар, шунингдек, Венесуэла мухолифати вакилларидан бири маълум қилди.

Венесуэла президенти учувчисини ёллаш режаси 2024 йил апрел ойида ишлаб чиқилган. Шу пайтда АҚШ ички хавфсизлик вазирлигининг 50 ёшли агенти Эдвин Лопес Доминикана Республикасидаги АҚШ элчихонасида атташе бўлиб ишлаган.

Ахборотчи унга Мадуро билан боғлиқ иккита қимматбаҳо Dassault Falcon 2000EX ва Dassault Falcon 900ЕХ самолётлари пойтахт Санто-Домингодаги аэропортлардан бирида таъмирланаётганини айтди. Лайнерларга беш нафар учувчи, жумладан, бош учувчи генерал Битнер Вилегас ҳамроҳлик қилган.

АҚШ агентлари учувчиларни сўроқ қилган, аммо уларнинг Мадуро ва Венесуэланинг бошқа юқори мартабали амалдорлари билан алоқаларини билмасликка олган. Улар охирги бўлиб Вилегас билан гаплашган. Суҳбат охирида Лопес учувчига катта мукофот эвазига Мадурони қўлга олиш мумкин бўлган жойга етказишни таклиф қилган. Учувчига бундай жойни танлаш таклиф қилинган – Доминикана, Пуэрто-Рико ёки Гуантанамо кўрфазидаги АҚШ ҳарбий базаси.

Венесуэлалик учувчи аниқ жавоб бермаган, бироқ Лопесга мобил телефон рақамини қолдирган. Агентлар буни яхшилик аломати деб билган. Учувчиларга Венесуэлага қайтишга рухсат берилган, аммо самолётлар мамлакатга қарши санкциялар режими доирасида мусодара қилинган.

Лопес 16 ой давомида Вилегас билан хат ёзишиб, уни Мадурони ўғрилашга кўндирмоқчи бўлди. У 2025 йил июл ойида нафақага чиққанидан кейин ҳам учувчи билан мулоқот қилишда давом этган ва август ойида АҚШ Венесуэла президентини қўлга олишда ёрдам берганлик учун мукофотни 50 миллион долларга оширганидан кейин учувчига бу ҳақда маълумот юборган. Аммо охир-оқибат учувчи Лопеснинг хабарларига жавоб беришни тўхтатган.

Агентлик манбаларига кўра, режа барбод бўлгач, агент ва Мадурога қарши ҳаракатнинг бошқа иштирокчилари Венесуэла раҳбарини ғазаблантиришга қарор қилган. 19 сентябр куни Доналд Трамп биринчи маъмуриятининг собиқ амалдори, Венесуэла мухолифатига яқин бўлган Маршалл Биллингсли ижтимоий тармоқларда Вилегасни туғилган куни билан табриклаган. Шунингдек, у генералнинг Доминиканада Лопес билан суҳбати чоғидаги суратни эълон қилган.

Associated Press нашрига кўра, пост Мадуронинг самолёти Каракасдан учиб кетишидан бир дақиқа олдин эълон қилинган. 20 дақиқадан сўнг самолёт кутилмаганда аэропортга қайтган.

Биллингслининг пости Венесуэла ижтимоий тармоқларида шов-шув келтириб чиқарди. Мадуронинг рақиблари учувчига сўроқлаш учун ортга қайтиш буюрилганини тахмин қилди. Бошқалар уни қамаб қўйишлари мумкинлигидан хавотирда эди.

Бир неча кун Вилегасдан дарак бўлмади. 24 сентябр куни у венесуэлалик учувчиларнинг садоқати ва хиёнат қилмаслиги ҳақида ҳикоя қилувчи тарғибот телекўрсатувида пайдо бўлди.

Associated Press ўз мақоласида учувчини ёллашга уринишни жосуслик триллерига қиёслайди. «Кенгроқ маънода, бу схема АҚШ йиллар давомида Мадурони ағдаришга қанчалик қаттиқ ва кўпинча бепарволик билан ҳаракат қилганини кўрсатади», дейилади мақолада.