Душанба куни Ҳўрмуз бўғози яқинида АҚШ армиясининг «Apache» зарбдор вертолёти қулаб тушди ва унинг икки нафар экипаж аъзоси соғ-саломат қутқариб олинди. Бу ҳақда воқеадан хабардор бўлган икки манбага таяниб New York Times нашри маълум қилди.
Манбалардан бирига кўра, «Apache» Эрон зарбаси натижасида уриб туширилганими, техник носозликка учраганми – ҳозирча аниқ эмас. Айни пайтда ҳодиса юзасидан суриштирув ишлари олиб борилмоқда.
Ушбу воқеа минтақада ҳарбий ҳаракатлар кескинлашиб, сўнгра бироз пасайган кунлардан кейин юз берди. Айни якшанба ва душанба кунлари Исроил ва Эрон ортга чекинишдан олдин ўзаро ҳарбий зарбалар алмашганди.
АҚШ президенти Доналд Трамп сешанба куни эрталаб журналистларга экипаж аъзоларининг аҳволи яхши эканини айтди. У бошқа тафсилотларни очиқламади ва яқин орада воқеа юзасидан расмий ҳисобот эълон қилинишини билдирди.
АҚШ армияси Марказий қўмондонлиги ва Давлат департаменти ҳозирча ҳолатга изоҳ бермади.
Минтақада блокада ва йўқотишлар
Эрон блокадасига жавобан Қўшма Штатлар 13 апрель куни ўз блокадасини жорий этди ва тижорат кемаларининг Эрон портларига кириши ёки у ердан чиқишини тақиқлаб қўйди. Ўшандан бери АҚШ ҳарбий кемалари 134 та кемани ортга қайтарди.
АҚШ ҳарбийлари Ҳўрмузда «Apache» вертолётлари, қуролланган MQ-9 Reaper дронлари ҳамда F/A-18 ва F-35 қирувчи самолётларидан фойдаланиб келмоқда. Бу чоралар Марказий қўмондонликнинг Эронга қарши блокада ҳаракатларининг бир қисмидир.
Нашрнинг ёзишича, уруш бошланган 28 февралдан буён Эрон АҚШнинг 30 га яқин Reaper дронларини уриб туширди. Шунингдек, АҚШнинг бир нечта қирувчи самолётлари - душман ва ўзларининг нотўғри ўт очиши (friendly fire) натижасида бой берилди. Бироқ, бу – ушбу можарода йўқотилган илк «Apache» вертолёти бўлиши мумкин.
«Hellfire» ракеталари билан қуролланган AH-64 «Apache» зарбдор вертолёти минтақада фаолият юритаётган энг даҳшатли ҳарбий авиация турларидан биридир.
