Думaда «чет эл агентлари»нинг пенсия олишини чеклаш талаб қилинди

Давлат думаси спикери Вячеслав Володиннинг фикрича, «чет эл агенти» деб эълон қилинган шахсларнинг пенсия тўловлари махсус ҳисобларга ўтказилиши, бундай ҳисобларга кириш эса фақат Россияга қайтганидан сўнг берилиши керак.

Фото: Андрей Любимов / РБК

Володин 29 октябр куни, «чет эл агенти» деб тан олинган россияликларни уларга тўланадиган пенсияларни эркин олиш ҳуқуқидан маҳрум этишни таклиф этди. Унинг таъкидлашича, тўловлар махсус ҳисобларга йўналтирилиши, маблағни олиш учун эса «чет эл агентлари» Россияга қайтиб, жавобгарликка тортилган бўлиши лозим. Чунки улар, унинг таъбири билан айтганда, «ўз мамлакатига хиёнат қилган» ва «давлатга зарар етказмоқда».

«Бизда нима бўляпти: мамлакатни вайрон қилаётган, унга хиёнат қилган одам Париж бўйлаб, бошқа Европа шаҳарлари бўйлаб юради-ю, пенсияни Россиядан олади», — деди у Дума мажлисида.

Унинг фикрича, Россия давлатига қарши фаолият «вайронкор» бўлгани учун ҳокимият «давлатчилик ичидан емирилиши»нинг олдини олиш учун «қўлдан келган ҳамма ишни» қилиши керак.

2024 йил декабрида Дума «чет эл агентлари» даромадларини махсус рубл ҳисобларига киритиш тўғрисидаги қонунни қабул қилган эди. Бу маблағлардан фақат «чет эл агенти» мақоми бекор қилинганидан кейин фойдаланиш мумкин. Қонун 2025 йил март ойида кучга кирди. Шундан сўнг Boosty донат хизмати «чет эл агент»лари аккаунтларини блоклагани маълум бўлди.

2025 йил сентябр ойида Давлат думаси «чет эл агентлари»га нисбатан жиноят иши қўзғатиш тартибини соддалаштирди: тегишли реестрга киритилган шахсга фаолият тартибини бузгани учун берилган илк жаримадан кейиноқ жиноят иши очишга рухсат берилди.