Энг яхши 50 нафар техникум педагоглари ҳар йили хорижда малака оширади

Президент қарорига мувофиқ, техникум педагоглари учун босқичма-босқич малака ошириш тизими жорий этилди. Унга кўра, умумтаълим, махсус фан ўқитувчилари ва ишлаб чиқариш таълими усталари учун алоҳида платформалар белгилаб берилди, энг яхши натижа кўрсатган 50 нафар педагог йилма-йил хорижга юборилади.

Техникумлар ўқитувчилари малакасини тизимли ошириш мақсадида президентнинг ПҚ–316-сон қарори қабул қилинди.

Ҳужжатга кўра:

• умумтаълим фанлари ўқитувчилари А. Авлоний номидаги Педагогик маҳорат миллий институти ва ҳудудий педагогик маҳорат марказларида тайёрланади;
• махсус фанлар ўқитувчилари етакчи олий таълим ташкилотларида малака оширади;
• ишлаб чиқариш таълими усталари ҳудудий илғор касбий маҳорат техникумлари ҳамда тегишли соҳалар бўйича малака ошириш ташкилотларида ўқитилади.

Қарорга мувофиқ, ҳар йилги малака ошириш жараёнида юқори самара кўрсатган 50 нафар педагог — ишлаб чиқариш таълими устаси, умумтаълим ва махсус фан ўқитувчилари — хорижий таълим муассасалари ва марказларида қисқа муддатли курсларга юборилади. Бу ташаббус педагог кадрларнинг замонавий методикаларни ўзлаштириши, ишлаб чиқариш ва таълим интеграциясини кучайтириш, шунингдек, техникумларда ўқув жараёни сифатини оширишга хизмат қилади.