Сейм Латвиянинг Истанбул конвенциясидан чиқишини маъқуллади

Бир палатали Латвия парламенти — Сейм — 30 октябр куни Европа кенгашининг аёлларга нисбатан зўравонлик ва оилавий зўравонликнинг олдини олиш ҳамда уларга қарши кураш тўғрисидаги конвенциясини (“Истанбул конвенцияси”) денонсация қилиш ҳақидаги қонун лойиҳасини иккинчи, якуний ўқишда маъқуллади. Delfi портали хабарича, парламентдаги қизғин баҳслар 12 соат давом этди. Лойиҳа учун 56 депутат овоз берди, 32 нафари қарши чиқди, яна икки депутат бетараф қолди.

Ўн кун ичида президент Эдгарс Ринкевичс қонун лойиҳасини имзолаши ёки уни қайта кўриб чиқиш учун Сеймга қайтариши керак.

Аввалроқ Ригадаги парламент биноси олдига минглаб одамлар Истанбул конвенциясидан чиқишга қарши норозилик билдириш учун тўпланди. Плакатларда оилавий зўравонликка қарши чақириқлар, шунингдек депутатларни популизмда ва “зўравонларни ҳимоя қилиш” бўйича айбловлар ёзилган эди. Қатор намойишчилар Латвия ҳокимиятини “Россияга тақлид қилиш”да айблади, чунки Европа кенгаши томонидан 2011 йилда ишлаб чиқилган ушбу конвенцияни Москва имзоламаган. Полиция маълумотича, акцияда тахминан 5000 киши қатнашди. Митинг ҳодисаларсиз ўтди.

Истанбул конвенцияси аёлларга нисбатан зўравонликни инсон ҳуқуқлари бузилиши сифатида таснифлайди. Ҳужжатни Европанинг 38 давлати, шу жумладан Гуржистон ратификация қилган. Латвиядаги танқидчилар конвенцияни анъанавий оилавий қадриятларга зид, деб ҳисоблайди, айримлар ҳужжатдаги “жинс” (gender) тушунчаси таърифини танқид қилади.

Агар президент қонун лойиҳасини имзоласа, Латвия Истанбул конвенциясидан чиқадиган илк ЕИ давлатига айланади. Бундан аввал Туркия конвенциядан чиққан. Шу билан бирга, Болгария, Венгрия, Чехия, Литва, Словакия ва Арманистон ҳужжатни имзолагани билан ҳалигача ратификация қилмаган.