Киевга Tomahawk: сиёсий қарор Трамп қўлида

Пентагон узоқ масофали Tomahawk ракеталарини Украинага етказиб беришга розилик берди — бу қарор АҚШдаги захиралар етарли, деган баҳодан кейин қабул қилинган. Энди бу масала бўйича сиёсий қарорни АҚШ президенти Доналд Трамп қабул қилиши керак, деб 31 октябр куни CNN телеканали масалага «яқин» уч нафар америкалик ва европалик амалдорга таяниб хабар қилди.

Канал ёдга солишича, 2025 йил октябрида Украина президенти Володимир Зеленский билан тушликда Трамп Киевга «Томагавк» бермасликни маъқул кўриши, чунки улар АҚШ ҳимояси учун кераклигини айтган эди. Шу билан бирга, журналистлар даъво қилишича, ҳарбийлар ўз баҳоларини Оқ уйга ой бошида — Трампнинг Зеленский билан учрашувидан олдин — етказган.

CNN’нинг таъкидлашича, Пентагоннинг ушбу баҳоси Европадаги АҚШ иттифоқчиларини руҳлантирган — энди уларнинг фикрича, Вашингтоннинг ракета етказиб беришни рад этиш учун «баҳоналари камайган». Хабар чоп этилган пайтга қадар Оқ уй ҳам, Пентагон ҳам CNN’нинг изоҳ сўровига жавоб бермаган.

Телеканал эслатишича, аввалроқ унинг манбалари Трамп «ракеталар масаласини кун тартибидан олиб ташламагани»ни айтган ва агар президент тегишли буйруқ берса, маъмурият уларни Украинага тезкор етказиш режаларини тайёрлаб қўйган.

Шу билан бирга, манбаларга кўра, ҳарбийларда Киев ракеталарни қандай жойлаштириши ва шахсий таркибни улардан фойдаланишга қандай ўқитиши масалалари бўйича саволлар сақланиб қолмоқда. Энг кўп ҳолатда «Томагавк»лар сувусти ёки сувости кемаларидан учирилади, аммо Украина денгиз кучлари жиддий заифлашган. Шу боис, журналистлар ёзишича, денгиз пиёда қўшинлари ва қуруқлик қўшинлари томонидан ерусти қурилмалари ишлаб чиқилган ва уларни Украинага бериш мумкин.

24 октябр куни Лондонда «кўнгиллилар коалицияси» учрашуви доирасида ўтказилган матбуот анжуманида НАТО бош котиби Марк Рютте Трамп билан Украинага Tomahawk ракеталарини етказиш масаласини муҳокама қилганини, бу ғоядан бутунлай воз кечиш ҳақида гапиришга ҳали эрта эканини айтди.

«Аниқроқ айтганда, “Томагавк”лар бўйича — президент (Трамп) ва мен буни муҳокама қилдик. Масала президент кўриб чиқишида қолмоқда, яна айтаман: бу — Қўшма Штатлар қарор қиладиган масала», — дея Рюттенинг сўзларини Reuters келтирди. У ҳар бир Украинa иттифоқчиси Киевга қандай қурол бериши ўзи ҳал қилишини таъкидлаб, «Томагавк»ларсиз ҳам АҚШ Украинани сезиларли ҳарбий қўллаб-қувватлаётганини қўшимча қилди.