NEO роботи автоном эмаслиги ва одам томонидан бошқарилиши маълум бўлди

Норвегиянинг 1X Technologies стартапи NEO уй одамсимон роботини тақдим этди ва «барча уй ишларини ўзи бажарадиган ёрдамчини» ваъда қилган эди. Бироқ, маълум бўлишича, роботнинг кўплаб ҳаракатлари ортида ҳозирча VR-интерфейси ва масофадан бошқариш тизими орқали роботга уланган инсон-оператор туради.

Фото: 1X

Қайд қилинишича, NEO вазифаларнинг фақат бир қисмини мустақил равишда бажаради. У ҳал қила олмайдиган вазиятга дуч келганида, ишга масофадан туриб ишловчи оператор - камералар орқали «роботнинг кўзи билан қарайдиган» ва унинг ҳаракатларини бошқарадиган ҳақиқий одам қўшилади.

Компания бундай ёндашувни Expert Mode деб атади: оператор роботга мураккаб ҳаракатларни бажаришга ёрдам беради (масалан, ностандарт буюмни тозалаш ёки техника билан ўзаро таъсир), бу жараёнда эса робот келажакда буни ўзи такрорлаши учун сунъий интеллект тизимини ўқитади.

Амалда бу NEO ҳали тўлиқ автоном қурилма эмаслигини англатади.

Ишлаб чиқувчининг таъкидлашича, масофадан бошқариш хато эмас, балки ўрганиш босқичидир. Аммо саволлар туғилади: уйда нима бўлаётганини ким кўриб ўтиради ва бу маълумотлар қандай сақланади?

NEO - маиший робототехника соҳасида олдинга ташланган таъсирчан қадам, аммо ҳозирча у нафақат «келажакнинг ақлли ёрдамчисини», балки экран ортида ишлаётган робот кийимидаги одамни эслатади.

Тайёрлаган: Сардор Юсупов

#Норвегия #1X Technologies #NEO