Украина 2025 йилда РФ нефт объектларига 160 та зарба берди

Унинг аниқлик киритишича, сентябр ва октябр ойларининг ўзида 20 та объект урилиб, ишдан чиқарилган: «Жумладан, 6 та нефтни қайта ишлаш заводи, 2 та нефт терминали, 3 та нефтебаза ва 9 та нефт қуйиш станцияси».

Малюкка кўра, Украина зарбалари натижасида Россия ички бозорида нефт маҳсулотлари бўйича 20 фоиздан ортиқ танқислик, НҚЗ қувватларининг 37 фоизи тўхташи, шунингдек РФнинг 57 регионида нефт маҳсулотлари етишмовчилиги ва «йил охиригача бензин экспортини тақиқлаш» юзага келган.

Шу билан бирга, украин дронларига самарали қарши тураётган тизимлар — Россиянинг «Панцирь» ЗРК, деди СБУ раҳбари: «Жорий йил бошидан буён бугунгача душманнинг ‘Панцирь’ларининг 48 фоизини йўқ қилдик. Бу — бугунги кунда устувор йўналиш, уни Украина президенти белгилаб берган».

Украина президенти Володимир Зеленский 24 октябр куни Лондонда ўтган «кўнгиллилар коалицияси» учрашуви доирасидаги матбуот анжуманида АҚШни Россия нефтига қўйилган санкцияларни бутун секторга кенгайтиришга ҳамда Украинага узоқ масофали Tomahawk ракеталарини бериш орқали қўллаб-қувватлашни оширишга чақирди.

Зеленский АҚШ президенти Доналд Трампнинг «Роснефть» ва «Лукойл»га санкциялар жорий этиш қарорини «катта қадам» деб атади ва шу каби босимни бутун тармоққа қўллаш зарурлигини таъкидлади: «Бундан ташқари, биз дрон ва ракеталардан фойдаланган ҳолда Россиянинг нефт секторини аниқ нишонга олган ўз босим кампаниямизни олиб бормоқдамиз», — деди у.