Британияда поездда пичоқ билан қилинган ҳужум: 32 ёшли эркак ушланди

Шанба куни кечқурун Донкастердан Лондонга йўл олган LNER тезюрар поезди Питербородан чиққач, Хантингдон яқинида оммавий пичоқлаш ҳодисаси содир бўлди. 11 нафар жабрланувчи шифохонага етказилди, улардан биттасининг аҳволи ўта оғир. Бошида икки киши қўлга олинган бўлса-да, полиция ҳозир 32 ёшли Британия фуқаросини ягона гумонланувчи сифатида ушлаб турибди.

Фото: JUSTIN TALLIS / AFP

Британия Транспорт полицияси (BTP) соат тахминан 19:42 да биринчи чақириқни қабул қилган ва бир неча дақиқа ичида қуролланган ходимлар ҳодиса жойига етган. Поезд Хантингдон станциясида режадан ташқари тўхтатилган, 8 дақиқа ичида дастлабки икки гумонланувчи қўлга олинган. Кейинроқ 35 ёшли британиялик (асли келиб чиқиши Карибдан) айбловсиз қўйиб юборилди, 32 ёшли питерборолик эркак эса сўроққа олиб кетилди. Полиция ҳодиса терроризм билан боғлиқ эмаслигини маълум қилди.

Гувоҳларга кўра, одамлар вагонлар орасида қочиб, баъзилари ҳожатхоналарга беркиниб олган, ўриндиқлар қонга беланиб кетгани айтилмоқда. LNER ходими ҳужумчини тўхтатишга уриниб, оғир жароҳат олган — BTP унинг хатти-ҳаракатини «қаҳрамонона» деб атади.

Жами 11 киши шифохонага мурожаат қилган: 10 нафари «тез ёрдам» билан, яна бир киши кейинроқ ўзи борган. Якшанба оқшомига келиб, бир жабрланувчи ҳали ҳам ўта оғир ҳолатда. Полиция «Плато» (оммавий террор хуружига жавоб бериш миллий код сўзи) режимини қисқа фурсатга эълон қилган, кейин бекор қилган.

Буюк Британия бош вазири Кир Стармер ҳодисани «ташвишли» деб атади, ички ишлар вазири Шабана Маҳмуд жабрланувчиларга ҳамдардлик билдирди. Қирол Чарлз III ҳам баёнот бериб, фавқулодда хизматларга миннатдорлик изҳор этди.

Ҳодиса Лондон — Эдинбург йўналишидаги East Coast Main Line тармоғида содир бўлди. Полиция ҳозирча ягона гумонланувчининг мотиви ва ҳодисагача бўлган ҳаракатларини ўрганмоқда, ҳозирги пайтда бошқа гумонланувчилар қидирилмаяпти.