Эрон ТИВ раҳбари зарбалардан кейин йўқолган уран қаерда эканини очиқлади

АҚШ зарбаларидан кейин йўқолди, деб хабар қилинган 60 фоизгача бойитилган 400 килограмм ураннинг катта қисми ўша — Эрон ядровий объектларининг вайроналари остида, деб маълум қилди Эрон ташқи ишлар вазири Аббос Арағчи Al Jazeera’га берган интервюсида. Интервю парчаси унинг Telegram-каналида эълон қилинди.

Арағчининг айтишича, «деярли барча» ушбу материаллар зарбалар натижасида йўқ қилинган корхоналарнинг «вайроналари остида» қолган. «Биз уларни вайроналар остидан тайёр бўлмагунча чиқармаймиз. Албатта, бу 400 килограммдан қанчаси яхши ҳолатда қолгани, қанчаси йўқолганини ҳозир билмаймиз ва вайроналардан чиқариб олмагунча билмаймиз», — деди у.

Арағчи АҚШнинг Эрон ядровий объектларига зарбаларидан етган зарарни «жуда катта» деб баҳолаб, бинолар ва ускуналар вайрон бўлганини билдирди. Шу билан бирга, у «технологиялар йўқ қилинмаганини» таъкидлаб, «бизнинг иродамиз йўқолмади, ҳатто урушдан кейин янада кучайди», дея қўшимча қилди.

Июн ойида Исроил ва Эрон ўртасида 12 кунлик уруш бўлиб ўтди. Исроил бош вазири Бинямин Нетаняҳу операцияни бошлаш қарорини Теҳроннинг ядровий қурол яратишга яқинлашиб қолгани билан изоҳлади. Қарши томонга АҚШ ҳам қўшилди ҳамда Фордо, Исфаҳон ва Натанздаги Эрон ядровий дастурининг энг йирик объектларига зарбалар берди.

Гарчи АҚШ президенти Доналд Трамп Эрон ядровий дастури «йўқ қилинганини» айтган бўлса-да, Теҳрон уни қайта тиклаш имкони борлигини маълум қилди. АЭХА 60 фоизгача бойитилган 400 кг уран изини топиб бўлмаётганини эълон қилди. Агентлик раҳбари Рафаэл Гросси июн охирида Эрон бир неча ой ичида уранни бойитиш жараёнини қайта бошлаши мумкинлигини айтган. Зарбалардан кейин Теҳрон АЭХА билан ҳамкорликни тўхтатиб турди.

АҚШ Эронни янги ядровий келишув бўйича музокараларни қайта бошлашга чорлаб, бу бўйича таклифни Уммон орқали етказган. Арағчига кўра, Теҳрон Вашингтоннинг «ақлли, мувозанатли ва адолатли таклифи»ни кўриб чиқиши мумкин, бироқ уранни бойитишдан воз кечиш нияти йўқ.