АҚШда юк самолёти қулади, қурбонлар сони ортмоқда

АҚШнинг Луисвилл шаҳрида United Parcel Services компаниясининг юк самолёти қулаши оқибатида ерда яна 11 киши жароҳат олди, деб хабар берди Кентукки губернатори Энди Бешир.

Аввалроқ губернатор уч киши ҳалок бўлганини маълум қилганди. «Менимча, бу рақам ўсиб боради. Видеодаги кадрларни кўрган ҳар бир киши бу фалокат қанчалик даҳшатли бўлганига амин бўлади», – деди у журналистларга.

UPS маълумотларига кўра, MD-11 бортида экипажнинг уч нафар аъзоси бўлган.

WLKY телеканали ҳалокат рўй берган вақтда олинган кадрларни намойиш этди – унда самолёт ҳавога кўтарилганида қаноти ёнаётганини, ерга урилганда эса улкан оловли шар ҳосил бўлганини кўриш мумкин. Қуёш ботиши арафасида содир бўлган ҳалокат туфайли аэропортга туташ саноат зонасида давомли ёнғинлар юзага келди, деб ёзади Reuters.

Самолёт парчалари иккита учиш-қўниш йўлаги бўйлаб сочилиб кетган. Губернаторнинг сўзларига кўра, ерда бир неча киши жиддий жароҳат олган.

Федерал фуқаро авиацияси бошқармаси маълумотларига кўра, ҳалокатга учраган самолёт 34 йил аввал ишлаб чиқарилган. У маҳаллий вақт билан 17:15 атрофида ҳалокатга учраган.

Самолёт Ҳавайига учиши керак эди. Гонолулугача 8,5 соатлик парвоз учун у 38 минг галлон ёнилғи (тахминан 144 минг литр) билан тўлдирилганди.

Луисвилл аэропортида UPS Worldport – компаниянинг юк авиаташувлари бўйича глобал маркази ва дунёдаги энг йирик жўнатмаларни қайта ишлаш маркази жойлашган.

Расмийлар аэропортдан 8 км радиусдаги барча аҳоли пунктлари аҳолиси учун ўзини изоляция қилиш тўғрисида буйруқ чиқарди. «Жабрланганлар кўп, ёнғин давом этмоқда. Бу ҳудудда кўплаб йўллар тўсиб қўйилган – илтимос, воқеа жойидан узоқроқ бўлинг», – дея илтимос қилган Луисвилл шаҳри мэри Крейг Гринберг.

McDonnell Douglas MD-11F – Американинг McDonnell Douglas фирмаси томонидан ишлаб чиқилган узоқ масофали транспорт самолёти бўлиб, асосан FedEx Express, Lufthansa Cargo ва UPS Airlines томонидан юк ташиш учун ишлатилади.

McDonnell Douglas билан бирлашиш чоғида MD-11 дастурини қўлга киритгач, уни ёпган Boeing компанияси жабрланганларнинг хавфсизлиги ва фаровонлигидан хавотирда экани ва терговда ҳамкорлик қилишини маълум қилди.

Flightradar24 маълумотларига кўра, UPS компанияси 2006 йилда фойдаланишни бошлаган ушбу самолёт сешанба куни Луисвиллдан Балтиморга учиб, кейин қайтиб келганди. Ҳалокатдан олдин лайнер 175 фут (тахминан 51 метр) баландликка кўтарилган ва 184 узел (341 км/соат) тезликка эришган, кейин эса кескин пасая бошлаган.

UPS ҳодиса оқибатида жабрланганлар ёки жароҳатланганлар ҳақидаги маълумотни ҳали тасдиқламаганини маълум қилди. АҚШ Миллий транспорт хавфсизлиги кенгаши (NTSB) вакили кенгаш терговга бошчилик қилишини маълум қилган. Одатда бундай суриштирувлар бир йилдан икки йилгача давом этади.

Самолёт ҳалокатга учраганидан кейин Луисвилл аэропорти ёпилган. Ҳалокат UPS ва компаниянинг асосий мижозлари, жумладан Amazon, Walmart ва АҚШ почта хизмати фаолиятини издан чиқаради. Компания авиа ва халқаро жўнатмаларни етказиб беришнинг режалаштирилган муддатларида ўзгаришлар бўлиши мумкинлигини маълум қилди.

Кентукки губернатори самолёт бортида экологик муаммони келтириб чиқариши мумкин бўлган ҳеч қандай хавфли юк бўлмаганини таъкидлаган.

Reuters’нинг ёзишича, терговчилар кўриб чиқадиган асосий масалалардан бири - ҳалокатдан олдин битта двигател самолётдан ажралиб чиққани сабабини аниқлашдир. Бу ҳақда агентликка вазиятдан хабардор манба учиш майдонидаги вайроналар акс этган видеоёзувларга таяниб маълум қилди.

Парвозлар хавфсизлиги бўйича эксперт ва учувчи Жон Кокснинг айтишича, терговчилар уч двигателли самолёт биринчи двигател ёниб кетганидан кейин нима учун ҳавога кўтарила олмаганини ҳам аниқлаши керак. «Бу ёнғин оддий, одатий двигател учун жуда катталик қилади. У жуда катта эди», – деб ҳисоблайди эксперт.

«Бу самолёт иккита двигателда ҳам учавериши керак эди. Шунинг учун энди унинг парвозига нима тўсқинлик қилганини аниқлашимиз керак», – дея қўшимча қилди у.