Трамп Путин ундан урушни тугатишда ёрдам беришни сўрагани ҳақида гапирди

АҚШ президенти Доналд Трамп икки ҳафта олдин Россия президенти Владимир Путиннинг ўзи ундан Россия-Украина урушини тугатишда ёрдам беришни сўраганини айтди.

Трампнинг таъкидлашича, Путин унга Россия «ўн йилдан бери бу урушни тугатишга уринаётгани» ҳақида гапирган.

«Мен икки ҳафта олдин Путин билан гаплашдим ва у шундай деди: „Биз 10 йилдан бери урушни тугатишга ҳаракат қилмоқдамиз, аммо бунинг уддасидан чиқа олмадик. Энди буни сен ҳал қилишинг керак“», – деди АҚШ президенти.

Кремлда Трампнинг сўзларига изоҳ берилмади.

Путин кўп марта урушни Россия «бошламагани»ни (гарчи айнан у урушни бошлаган бўлса-да), аксинча, уни тугатишга интилаётганини таъкидлаган. Россия пропагандаси версиясига кўра, можарода Россия манфаатлари билан ҳисоблашмаган Ғарб давлатлари ва НАТОга кирмоқчи бўлган ва гўёки Донбассда «рус тилида сўзлашувчи аҳоли геноциди»ни амалга оширган Украина айбдор.

Трамп Владимир Путин урушни тугатишни истаётганига ишончи комил эканини бир неча бор очиқ айтган. Унинг сўзларига кўра, Россия президенти «ҳақиқатан ҳам АҚШ билан иш олиб боришни истайди» ва Вашингтон билан алоқаларни тиклашга интилмоқда.

Трамп 2025 йил бошидан буён кўп марта можарони имкон қадар тезроқ ҳал қилишда ёрдам беришга тайёрлигини эълон қилди ва кейин бу муддатларни доимий равишда суриб борди. 3 ноябр куни АҚШ президенти урушни «бир-икки ой ичида» тугатиш мумкинлигига яна бир бор ишонч билдирди.

Трамп ва Путин 16 октябр куни – АҚШ президентининг Украина президенти Володимир Зеленский билан учрашуви арафасида телефон орқали мулоқот қилди. Ўша суҳбат чоғида Трамп ва Путин тез орада Будапештда учрашув ўтказишга келишиб олишганди.

Кўп ўтмай саммит Трампнинг ўзи томонидан бекор қилинди. У буни «беҳуда учрашув ўтказишни истамаслиги» билан изоҳлади. Кейинчалик Америкадаги нашрлар ўз манбаларига таяниб, бу Москванинг муросасиз позицияси туфайли содир бўлганини ёзди: Россия Киевдан ҳудудий ён беришни талаб қилмоқда. Трамп эса фронтнинг ҳозирги чизиғи бўйича оташкесим таклиф қилган – бу позицияни Украина ва Евроиттифоқ қўллаб-қувватлади.

Трампнинг Путин билан учрашуви бекор қилинганидан кўп ўтмай, АҚШ янги санкциялар пакетини жорий қилди – бу Трамп Оқ уйга қайтганидан бери биринчиси бўлди. Чекловлар Россиянинг нефт-газ соҳасидаги иккита асосий компанияси – «Роснефт» ва «Лукойл»га нисбатан киритилди.