Қўшимча функционаллар
-
Тунги кўриниш
АҚШ Сурия президентини террорчилар рўйхатидан чиқарди
Сурия муваққат президенти лавозимини эгаллаб турган Аҳмад аш-Шаръа Вашингтоннинг террорчилар рўйхатидан мамлакат ички ишлар вазири Анас Ҳасан Ҳаттоб билан бирга чиқарилди. Бу ҳақда 7 ноябр кечқурун АҚШ Давлат департаменти сайтида хабар қилинди. Матнда қайд этилишича, БМТ Хавфсизлик Кенгаши (ХК)нинг АҚШ тайёрлаган резолюциясини қабул қилиши “Суриянинг янги босқичга ўтиши тасдиғи бўлган кучли сиёсий сигнал”дир.
Фото: Jeenah Moon/REUTERS
“Президент аш-Шаръа бошчилигидаги янги Сурия ҳукумати бедарак йўқолган америкаликларни излаш, терроризм ва наркотикларга қарши кураш бўйича ўз мажбуриятларини бажариш, кимёвий қурол қолдиқларини йўқ қилиш, минтақавий хавфсизлик ва барқарорликка кўмак бериш ҳамда инклюзив сиёсий жараённи қўллаб-қувватлаш учун бор кучини сарфламоқда”, — деб изоҳлади қарорни Давлат департаменти.
10 ноябр куни Суриянинг вақтинчалик президенти ўзининг илк ташрифи билан Вашингтонга келиши режалаштирилган. Кутилишича, Оқ уй раҳбари Доналд Трамп билан учрашувда у АҚШ бошчилигидаги ИШИДга қарши коалицияга қўшилиш тўғрисидаги келишувни имзолайди. Хавфсизлик Кенгаши санкцияларни бекор қилмаган тақдирда ҳам бу ташриф амалга ошар эди: аввалроқ ХКнинг санкциялар қўмитаси унга саёҳат рухсатномаларини берган.
6 ноябр куни БМТ Хавфсизлик Кенгаши Сурия президенти Аҳмад аш-Шаръа ва мамлакат ички ишлар вазири Анас Ҳаттобга нисбатан ИШИД ва “Ал-Қоида” билан боғлиқ халқаро санкциялар рўйхатидан чиқариш ҳақида қарор қабул қилди. АҚШ таклиф этган резолюцияни Россияни ҳам қўшган ҳолда 15 аъзо давлатдан 14таси қўллаб-қувватлади, Хитой бетараф қолди.
Dpa агентлиги ёзишича, Британия, Россия, Франция ва Покистон вакиллари бу қарорни Сурия иқтисодий тикланишига олиб борувчи муҳим қадам деб атади. Суриянинг янги ҳокимияти эса санкцияларнинг бекор қилинишида мамлакатга нисбатан “ишонч ортиши” ва халқаро ҳамжамиятга қайта интеграцияланиш имкониятини кўрди.
АҚШ бир неча ойдан буён ХК аъзоларини Сурияга нисбатан санкцияларни юмшатишга чақириб келаётган эди. Май ойида Трамп Вашингтоннинг Дамашққа нисбатан янги сиёсатини эълон қилиб, АҚШ жорий этган иқтисодий чекловларини бекор қилишини айтган.
ХК қароридан кейин Лондон ҳам Сурия президенти ва ички ишлар вазирини ўзининг ИШИД ва “Ал-Қоида”га қарши молиявий чекловлар рўйхатидан чиқарди. Октябрда қироллик Сурияда 2024 йил декабрида ҳокимиятга келган гуруҳни террористик ташкилотлар рўйхатидан чиқарган эди.
Reuters маълумотига кўра, Европа Иттифоқи ҳам аш-Шаръага нисбатан чекловларни бекор қилишга тайёрланмоқда. ЕК вакили: “Биз сурияликлар томонидан бошқариладиган тинч ва инклюзив ўтиш жараёнини қўллаб-қувватлашга содиқмиз”, — деб баёнот берди.
Аш-Шаръа 2024 йил охирида Башар Асадни ағдаргунга қадар Абу Муҳаммад ал-Жўлоний номи билан танилган. У 2003 йилда АҚШ бошчилигидаги халқаро коалиция кучларига қарши курашишни бошлаган. 2006 йилда америкалик ҳарбийлар томонидан қўлга олиниб, Ироқ қамоқхоналарида беш йил сақланган.
