Киев, Харкив, Полтава: Украина ҳудудлари электр таъминотисиз қолди

Россия Қуролли кучларининг “Центрэнерго” ташқи иссиқлик электр станциялари (ИЭС) ва бошқа энергетик инфратузилма объектларига ҳужумидан кейин Украина йирик шаҳарларида электр таъминоти бўйича оммавий муаммолар қайд этилди. “Укрэнерго”нинг 9 ноябр куниги баёнотига кўра, якшанба куни мамлакатнинг кўп минтақаларида электр таъминотидаги танаффуслар 8 дан 16 соатгача бўлди.

ДТЭК энергетик компанияси 8 ноябр куни Telegram’да хабар беришича, Киевда ўчиришлар давомийлиги сутка давомида 9,5—13,5 соат оралиғида бўлиши мумкин.

ТСН онлайн-ОАВ қўшимча қилганидек, “энг узун танаффуслар иккинчи навбат аҳолисини кутмоқда — улар куннинг ярмидан кўпроғини ёруғликсиз ўтказади”.

Маҳаллий Telegram-каналларда айрим объектлар қоронғиликка чўмгани акс этган кадрлар эълон қилинмоқда. Бироқ кўплаб дўкон ва дорихоналар генераторлар ва муқобил таъминот манбаларига уланган.

“Фокус” Telegram-канали маълумотида Харкивда қисман блэкаут кузатилгани айтилди. Маҳаллий ОАВ кучли кучланишдан кейин шаҳарнинг айрим туманларида электр ўчганини хабар қилди.

“Харкивда электр энергияси етишмовчилиги сезиларли. ‘Укрэнерго’ мажбурий авариявий ўчиришларни жорий этмоқда”, — деб ёзди мэр Игор Терехов Telegram’да. Унинг сўзларича, “айрим туманларда сув таъминоти бўйича узилишлар мавжуд, бошқаларида эса бу вақтинча юз бериши мумкин”.

Тереховга кўра, метро паноҳгоҳ режимида ишлаяпти. Ерусти электр транспорти ўрнига автобус йўналишлари қўйилган. “Бутун мамлакат бўйлаб — Лвивдан Сумгача, Одессадан Черниховгача — энергетиклар навбатдаги Россия зарбалари оқибатларини бартараф этмоқда”, — деди у.

Полтава вилояти ҳарбий маъмурияти раиси Владимир Когут шаҳарда электр, сув ва иссиқлик таъминотида узилишлар борлигини маълум қилди. Қозонхоналар муқобил манбаларга ўтказилди. “Полтаваоблэнерго” ўчириш жадвалларини эълон қилди — унга мувофиқ, аҳоли камида 10 соат электрсиз қолиши мумкин.

8 ноябр куни “Центрэнерго” Facebook’да Россиянинг тунги ҳаво ҳужумидан сўнг компаниянинг Украинадаги барча ИЭСи тўхтагани ва энергия ишлаб чиқармаётганини хабар қилди.

“Станциялар — ёнмоқда! Бизнинг ИЭС — ҳарбий объектлар эмас. Биз қурол ишлаб чиқармаймиз! Бизда тинч аҳоли ишлайди. Биз тўхтадик… Ҳозир — нол генерация. Нол!” — дейилган баёнотда.

“Центрэнерго” — Украина электр энергетикасидаги энг йирик корхоналардан бири, мамлакатдаги ягона давлат генерация компанияси. Унинг ишлаб чиқариш қуввати Украина электростанциялари умумий қувватининг тахминан 14 фоизини ташкил этади.

Энергетика вазири Светлана Гринчук United News телеканалига берган интервюсида 8 ноябрга ўтар тун 2022 йил февралда Россиянинг тўлақонли ҳужуми бошланганидан бери “энг оғир тунлардан бири” бўлганини таъкидлади.