Новороссийскдаги нефт базасига дрон зарар етказди

Краснодар ўлкаси оператив штаби «Шесхарис» нефт терминалига зарба берилгани ва объектда ёнғин келиб чиққанини тасдиқлади. Шунингдек, дрон парчалари уч кўп қаватли уй ва фуқаролик кемаcига зарар етказгани ҳақида ҳам хабар берилмоқда.

Фото: Dmitry Feoktistov/Tass/dpa/picture alliance

Новороссийскка дрон томонидан қилинган тунги ҳужум натижасида «Шесхарис» қайта юклаш мажмуасидаги нефт базасига зарар етди. Нефт терминалига зарба берилгани ва объектда ёнғин келиб чиққанини Краснодар ўлкаси оператив штаби 14 ноябр куни тасдиқлади. Қирғоқбўйидаги иншоотлар ҳам шикаст кўрган.

РБК-Украина хабар беришича, «Шесхарис» Россиянинг «Транснефть» компанияси нефт қувурларининг якуний нуқтаси ҳисобланади. Терминал экспорт учун нефт ва нефт маҳсулотларини қабул қилиш, сақлаш ва юклаш, шунингдек, Краснодар ўлкасидаги заводларга нефт етказиб бериш учун фойдаланилади.

Ҳодисадан бироз олдин Новороссийскда ҳаво ҳужуми хавфи тўғрисида огоҳлантириш эълон қилинган. Ҳудуд оператив штаби маълумотга кўра, дрон парчалари учта кўп қаватли уй ва бир фуқаролик кемаcини шикастлаган. Жами тўрт киши жабрланди.