Трамп BBC'дан 5 млрд долларгача тўлов ундиришни режалаштирмоқда

АҚШ президенти Доналд Трамп 14 ноябр куни ўз нутқи фрагментлари Panorama дастурида монтаж қилингани билан боғлиқ можаро учун Британия медиакорпорацияси BBC’ни, узр сўралганига қарамай, судга беришини маълум қилди. Аввалроқ BBC Трампдан унинг нутқи қандай кўрсатилгани учун расмий равишда узр сўраган, бироқ компенсация тўлашни рад этган эди.

«Биз уларни бир миллиарддан беш миллиард долларгача бўлган суммага судга беришни режалаштиряпмиз, эҳтимол, келаси ҳафта. Ўйлашимча, мен буни қилишимга тўғри келади. Улар ҳатто ўзлари ҳам фирибгарликни тан олди», — деди АҚШ президенти Air Force One самолёти бортида журналистлар билан суҳбат давомида.

Трамп, шунингдек, бу масалани Британия бош вазири Кир Стармер билан муҳокама қилмаганини, лекин у билан мустаҳкам муносабатларга эга эканини айтди ва дам олиш кунлари унга қўнғироқ қилишни режалаштираётганини қўшимча қилди. Reuters агентлиги қайд этишича, у Стармер унинг ўзи билан боғланишга урингани ва содир бўлган воқеалардан «жуда қаттиқ ноқулай ҳолатга тушгани»ни айтган.

BBCда «Трамп: иккинчи шанс?» номли ҳужжатли филм АҚШдаги 2024 йил президентлик сайловлари олдидан эфирга узатилган бўлиб, унда 2021 йил 6 январ куни айтилган Трамп нутқининг уч қисми бирлаштириб монтаж қилинган. Бундай монтаж 2020 йилги президентлик сайловлари натижаларини тасдиқлаш куни унинг тарафдорлари Капитолийга ҳужум қилган пайтда у зўравонликка чақирган, деган таассуротни уйғотган.

Оқ уй BBC’ни «фейк янгиликлар» тарқатишда айблади, Трамп адвокатлари эса корпорация филмда айтилганларни рад этмаса, узр сўрамаса ва компенсация тўламаса, BBC’га нисбатан 1 миллиард долларлик даъво қўзғатиш билан таҳдид қилган. Можаро фонида BBC бош директори Тим Дэйви ва BBC News янгиликлар бўлими раҳбари Дебора Тернесс истеъфо берди.

BBC Кенгаши раиси Самир Шох Оқ уйга йўллаган шахсий хатда у ҳам, медиакорпорация ҳам Трампнинг Капитолийга ҳужум куни айтган нутқининг қандай монтаж қилинганидан афсусдалигини билдирган. Корпорация, шунингдек, мазкур дастурни қайтадан намойиш қилмаслиги ҳақида ҳам маълум қилди.