Роналду Оқ уйда меҳмон бўлди

Саудия Арабистонининг «Ан-Наср» клуби ҳужумчиси Криштиану Роналду АҚШ президенти Доналд Трамп билан учрашди. Бу Оқ уйда Саудия Арабистони валиаҳд шаҳзодаси Муҳаммад ибн Салмон шарафига уюштирилган зиёфатда рўй берди.

«Ўғлим энди отасини кўпроқ ҳурмат қилади»

Маросимга Америка элитаси вакиллари ҳам таклиф этилгандид. Нуфузли меҳмонлар орасида давлат котиби Марко Рубио ва вице-президент Жей Ди Вэнс, савдо вазири Ҳовард Лютник, ФИФА президенти Жанни Инфантино, Apple директори Тим Кук, Tesla асосчиси Илон Маск, Amazon асосчиси Жефф Безос ҳамда йирик инвестор Дэвид Сакс кабилар бор эди. Улардан сўнггиси португалиялик футболчи томонидан олинган селфини ижтимоий тармоқда тарқатган.

Трамп минбарда туриб, Роналдуга таклифни қабул қилгани учун миннатдорчилик билдирган ва ўз ўғли, 19 ёшли Бэррон футболчининг мухлиси эканини айтган. «Бу ерда жуда кўп етакчилар тўпланди – юлдузлар, спортчилар... Менинг ўғлим – Роналдунинг катта фанати. Роналду эса шу ерда (қарсаклар). Бэррон у билан танишишга мушарраф бўлди ва мен ўйлайманки, у энди ўз отасини кўпроқ ҳурмат қилади – шунчаки мен уларни бир-бири билан таништириб қўйганим учун», – деди Трамп ўз чиқишида.

У Роналдуни барча даврларнинг энг буюк футболчиси (G.O.A.T.) деб атаган.

Роналду бу учрашув юзасидан муносабат билдирмади, аммо олдинроқ Пирс Морганга берган интервюсида Трамп билан мулоқот қилишни исташини айтганди. Футболчи уни дунёни ўзгартиришга қодир шахс деб атаб, у билан ўхшашликлари борлигини тан олганди. Шу билан бирга, Криштиану америкалик президентдан машҳурроқ эканини қайд этганди: «Ўйлайманки, бутун дунёда, ҳатто кичик оролларда ҳам мени кўпроқ танишади».

Июн ойида португалиялик ҳужумчи Трампга Португалия миллий жамоасининг «Тинчлик учун ўйнаймиз» ёзуви ҳамда ўз имзоси туширилган футболкасини юборганди.

АҚШ Канада ва Мексика билан биргаликда 2026 йил ёзида бўлиб ўтадиган футбол бўйича жаҳон чемпионати мезбонларидан бири саналади. Шу кунларда Португалия ҳам ушбу турнирга йўлланма олди. 40 ёшли Роналду учун бу фаолиятидаги сўнгги мундиал бўлиб қолади.

Ташриф ҳақида

Америка матбуоти эътибор қаратишича, бу Роналду АҚШга 2017 йилдан буён илк бор келишидир. У модел Кэтрин Майоргининг зўравонлик бўйича айблови туфайли анчадан буён ушбу мамлакатга сафар қилишдан тийилиб келади. Ушбу аёл бу ҳодиса 2009 йилда Лас-Вегасда рўй берганини иддао қилади, аммо футболчининг ўзи бунга иқрор бўлмаган.

Португалия миллий жамоаси бош мураббийи Роберто Мартинес учрашувга ижобий муносабат билдирди: «Криштиану – шунчаки футболчи эмас. У майдон ташқарисида ҳам кўп масалаларда ёрдам бериши мумкин. Бу барча португаллар учун қувончли кун – улар Оқ уйда мамлакат элчисини кўришмоқда».

Дипломатик можаро ва футбол

Шу билан бирга, кечки овқатнинг асосий меҳмони Роналду эмас, балки шайх Салмон эди. Бу Саудия Арабистони валиаҳд шаҳзодасининг 2018 йилда журналист Жамол Қошиқчи ўлдирилиши билан боғлиқ йирик дипломатик можародан бери илк бор АҚШга ташрифи бўлди.

Салмоннинг танқидчиси сифатида танилган Қошиқчи Саудия Арабистонининг Истанбулдаги элчихонасига кирганидан кейин йўқолган, у ўша ерда ўлдирилгани гумон қилинади. Америка разведкаси маълумотига кўра, валиаҳд шаҳзода бу операцияга розилик берган, лекин унинг ўзи бу айбловни рад этади.

Ҳозирга келиб АҚШ ва Саудия Арабистони ўртасидаги кескинлик йўқолган – Оқ уйдаги музокаралар чоғида журналистлардан бири Қошиқчи ҳақида савол берганида, Трамп Салмоннинг тарафини олиб чиқди: «Сиз гапираётган ўша кишини жуда кўпчилик ёқтирмаган. Уни ёқтирган бўлсангиз ҳам, ёқтирмаган бўлсангиз ҳам — воқеалар содир бўлади, лекин у (валиаҳд шаҳзода) бу воқеада ҳеч нарсани билмаган ва биз шу билан якунлаймиз. Сиз эса меҳмонларимизни ноқулай аҳволга солманг». Шаҳзоданинг ўзи ўша фожиани хатолик деб атаган ва бундай ҳолат бошқа такрорланмаслиги учун барча чоралар кўрилганини айтган.

Учрашув якунлари

Саудия делегациясининг ташрифи муваффақиятли бўлди: томонлар мудофаа шартномасини имзолади ва Америка иқтисодиётига триллион доллар сармоя киритишга келишиб олди.

Шайх Салмон футболга фаол сармоя киритиши билан танилган. У назорат қиладиган Саудия Арабистони суверен жамғармаси Про лига клубларига, жумладан, Роналду ўйнайдиган «Ан-Наср» клубига ҳомийлик қилади ва 2023 йилда Англиянинг «Нюкасл» клубини сотиб олган. Шаҳзоданинг саъй-ҳаракатлари Саудия Арабистонига 2034 йилда бўлиб ўтадиган жаҳон чемпионатига мезбонлик қилиш ҳуқуқини қўлга киритишга ёрдам берди. Роналду бу таклифни фаол қўллаб-қувватлаган, бу эса футболчи ва валиаҳд шаҳзоданинг мустаҳкам иттифоқидан далолат беради.