Украина Олий Радаси адлия ва энергетика вазирларини истеъфога чиқарди

Украина Олий Радаси чоршанба, 19 ноябр куни «Энергоатом» давлат корхонаси атрофидаги коррупция можароси фонида адлия вазири Герман Галушченко ва энергетика вазири Светлана Гринчукни истеъфога чиқариш учун овоз берди.

«РБК-Украина» хабарига кўра, Галушченкони ишдан бўшатиш масаласи бўйича овоз бериш пайтида мажлисда 338 депутат ҳозир бўлган: улардан 323 нафар депутат ижобий овоз берди, 15 нафар депутат овоз беришда қатнашмади. Гринчук бўйича қарор қабул қилиш чоғида 336 депутатдан 315 нафари унинг истеъфосини қўллаб-қувватлади. Вазирларнинг ўзи мажлисда бўлмаган. Адлия вазирлиги раҳбарининг вазифасини унинг ўринбосари, Европа интеграцияси масалалари учун жавобгар Людмила Сугак вақтинча бажаради. Гринчукнинг ўрнини ким эгаллаши ҳозирча маълум эмас.

Адлия ва энергетика вазирларини ишдан бўшатишни Украина президенти Володимир Зеленский 12 ноябр куни талаб қилган эди. Давлат раҳбарининг таъкидлашича, улар «коррупция бўйича тергов фонида лавозимида қолиши мумкин эмас»: «Бу, жумладан, ишонч масаласидир. Агар айбловлар бўлса, уларга жавоб бериш керак», — деган эди Зеленский.

Галушченко ва Гринчук ўша куниёқ истеъфо ҳақида ариза ёзган. Олий Рада вазирлар бўйича қарорни 18 ноябр куни қабул қилишни режалаштирган эди. Бироқ буни амалга оширишнинг иложи бўлмади, чунки парламент мажлисида мухолифатдаги «Европейская солидарность» фракцияси минбарни блоклаб, фақат икки вазиргина эмас, балки Юлия Свириденко ҳукуматининг бутун таркибини истеъфога чиқаришни талаб қилди.

Украина Миллий антикоррупция бюроси (НАБУ) ва Махсус антикоррупция прокуратураси (САП) давлатга қарашли «Энергоатом» компаниясида йирик коррупция схемаси фош этилгани ҳақида хабар берганди.

10 ноябр куни ҳуқуқни муҳофаза қилувчи органлар компанияда, шунингдек Адлия вазирлигида ишлашидан олдин Энергетика вазирлигини бошқарган Герман Галушченко ва Зеленскийнинг кўп йиллик ҳамкори, «Квартал 95» студияси эгаларидан бири Тимур Миндич уйларида тинтув ўтказган. Миндич тинтувлардан бир неча соат олдин мамлакатдан чиқиб кетгани айтилган.

НАБУ баёнотига кўра, «жиноий ташкилот фаолиятининг асосий йўналиши “Энергоатом” контрагентларидан шартномалар қийматининг 10–15 фоизи миқдорида тизимли равишда ноқонуний даромад олиш бўлган. Жумладан, “Энергоатом” контрагентларига кўрсатилган хизматлар/етказиб берилган маҳсулот учун тўловларни тўсиб қўймаслик ёки уларни етказиб берувчи мақомидан маҳрум этмаслик эвазига откат тўлаш шарти қўйилган», — дея ёзади ташкилот.

11 ноябр куни «Энергоатом» кузатув кенгаши навбатдан ташқари мажлис ўтказди. Шундан сўнг бош вазир Юлия Свириденко ҳукуматнинг компания кузатув кенгашининг амалдаги таркибини муддатидан олдин вазифасидан озод этиш қарорини қабул қилганини билдирди.