Тошкент-Лондон-Тошкент йўналишидаги рейс техник носозлик сабаб кечикмоқда

Kun.uz’га 21-22 ноябрь кунлари “Uzbekistan Airways”нинг Тошкент-Лондон-Тошкент йўналишидаги парвозлар охирига етмай, кечиккани юзасидан мурожаат келиб тушди.

21 ноябрь куни Тошкентдан Лондонга учаётган йўловчилардан бирининг ёзишича, улар Франкфуртда маҳаллий вақт билан 17:00да қўнишга мажбур бўлишган. Авиакомпания вакиллари бунга ёқилғи қуйиш сабаб бўлганини айтган.

“Кейин эса бир соат ичида учиб кетамиз дейишди. Йўловчиларни транзит зонасига олиб кетишди ва соат 21:00 гача у ерда ҳеч қандай эълон бермасдан ушлаб туришди. Рейсда кўплаб болалар ва қариялар бор эди.

Бизнинг норозилигимиздан сўнг, Lufthansa рейсига ўтказишга ҳаракат қилишларини айтишди. Лекин, албатта, ҳеч кимни бортга олишмади, худди улар бу ҳолатга биринчи марта шундай дуч келгандек таассурот қолдиришди.

Диппаспорт ва Шенген визаси бўлганларни олиб, меҳмонхонага жойлаштиришди, тунда уларга электрон чипталар бериб, эрталабки Лондон рейси билан Lufthansa орқали жўнатишди. Кўплаб Шенген визаси йўқ йўловчилар эса [кейинроқ] 01:40 да меҳмонхонага жойлашди. Бизга ҳеч қандай аниқ маълумот беришмади, вақтни чўзишди”, – дейди йўловчи.

Ўзбекистон ҳаво йўллари 2 томонлама рейс ҳақиқатан ҳам кечикканини маълум қилган. Қайд этилишича, Франкфурт аэропортида амалга оширилган режасиз қўниш сабабли HY201/202 рейсларининг кейинги учиш вақти, техник сабабларга кўра, 22 ноябрь санасига кўчирилган.

Шунга асосан маҳаллий вақтлар билан парвоз қуйидагича белгиланган:

• Франкфурт шаҳридан учиб кетиш – 15:00
• Лондонга етиб келиш – 15:25
• Лондондан учиб кетиш – 17:00
• Тошкентга етиб келиш – 04:55 (23 ноябрь)

Яна бир йўловчи эса янгиланган парвоз вақти ҳам бекор қилинганини, авиакомпания терминалда қолганларга алоқага чиқмаётганини айтмоқда.

“Биз Ташкент–Heathrow [Лондондаги аэропорт номи] рейси орқали 21 ноябрь куни учиб келишимиз керак эди, лекин ёқилғи етишмаслиги деб алдаб 1 кундан бери ҳеч қандай хабарсиз терминалда ушлаб туришибди.

Қачон учишимиз ҳам номаълум, 1-2 кун ҳам бўлиши мумкин экан. Одамлар Лондондаги ҳамма олмипиада мусобақаларини, саёҳатларини бекор қилишди. Шу рейс билан жуда муаммо бўляпти. Ҳамма ёзганлари ёлғон. Кечаси соат 02:30 гача аэропортда олиб юриб охири зўрға ҳотелга жойлаштиришдм. Бугунам берган вақтини бекор қилди. Умуман вакиллари алоқага чиқмаяпти”, – дейди у.

Kun.uz’га Франкфурт аэропортида бўлиб турган йўловчилар видео ҳам йўллашган. Унда авиакомпаниядагилар билан мулоқот давом этаётгани, рейс бўйича бир қарорга келинмай, турли вариантлар кўриб чиқилаётгани айтилади.