Вэнс Украина бўйича ҳар қандай тинчлик режасининг учта шартини айтди

АҚШ вице-президенти Жеймс Дэвид Вэнс (Жей Ди Вэнс) Украина бўйича ҳар қандай тинчлик режасининг таркибий қисми учта шарт бўлиши кераклигини айтди. Вэнс тегишли постни 21 ноябрь куни Х ижтимоий тармоғида жойлаштирди.

Вице-президент сўзларига кўра, бундай ҳар қандай таклиф «Украина суверенитетини сақлаб қолган ҳолда қотилликларни тўхтатиши» керак. Бундан ташқари, у «Россия учун ҳам, Украина учун ҳам мақбул бўлиши» ва «уруш қайта бошланмаслиги эҳтимолини максимал даражада ошириши» керак.

Вэнснинг қўшимча қилишича, маъмурият ишлаётган келишувни ҳар қандай танқиди ҳужжатни нотўғри тушунишга ёки баъзи муҳим ҳақиқатларни бузиб кўрсатишга асосланади.

«Агар биз шунчаки кўпроқ пул, кўпроқ қурол-яроғ берсак ёки кўпроқ санкциялар қўлласак, ғалаба яқин бўлади, деган хомхаёл бор», деб ёзди Вэнс.

«Тинчликка иллюзиялар дунёсида яшовчи ноқобил дипломатлар ёки сиёсатчилар томонидан эришиб бўлмайди. Унга реал дунёда яшовчи ақлли одамлар эришиши мумкин», деб хулоса қилди вице-президент.

АҚШ таклиф қилган тинчлик режаси ҳозирча эълон қилинмади, бироқ бир қатор ОАВ лойиҳадан парчаларни келтирди. Унга кўра, Украина Россияга ҳудудий ён босиши ва армиясини қисқартириши керак. Қўшма Штатлар ва Европа Украинани тиклашни молиялаштириш мажбуриятини олади, Россияга қарши санкциялар босқичма-босқич бекор қилинади, Москва ва Вашингтон эса узоқ муддатли иқтисодий ҳамкорлик тўғрисида битим тузади. Шунингдек, режа Киевга хавфсизлик кафолатлари берилишини назарда тутади.